'ქალები სამართლიანობისათვის' სამცხე–ჯავახეთში ქალებს ატრენინგებს

ტრენინგი დღეს, 17 ივლისს ახალციხეში ჩატარდა და მას როგორც ქალაქ ახალციხეში, ისე, ადიგენის, ასპინძისა და ახალციხის მუნიციპალიტეტის სოფლებში მცხოვრები ქალები დაესწრნენ. ტრენინგის 30 მონაწილეს ასწავლეს, როგორ გახდნენ ლიდერები და რა უნარებია საჭირო წარმატებული კომუნიკაციისთვის.

„სხვადასხვა პროფესიის ქალი ესწრება ტრენინგს. მათ შორის არიან, როგორც მასწავლებლები, ისე საჯარო მოხელეები და დიასახლისები. განსაკუთრებით სოფელში მცხოვრები ქალების გააქტიურება გვინდა. იმედი მაქვს, ტრენინგების შემდეგ გაუჩნდებათ სურვილი და პოლიტიკაშიც ჩაერთვებიან“, – ამბობს ორგანიზაციის თავჯდომარე ნათია ქევქიშვილი.

ტრენინგი პროექტის, „ქალები აქტიურ პოლიტიკაში“, ფარგლებში ჩატარდა. შემდეგი სესიები ისევ ახალციხეში, 24–25 ივლისსა და 31 ივლის–1 აგვისტოს იგეგმება. შემდგომ ტრენინგზე პოლიტიკურ სისტემებსა და პარტიებზე იმსჯელებენ და პოლიტიკოსებს შეხვდებიან.

„მონაწილეები უშუალოდ პოლიტიკოსებისგან მიიღებენ ინფორმაციას. ჩვენ პოზიციასთან და ოპოზიციასთან თანაბრად ვთანამშრომლობთ“, – აღნიშნა ნათია ქევქიშვილმა.

მისივე თქმით, მსგავსი ტრენინგების ჩატარება იგეგმება ახალქალაქსა და ნინოწმინდაში.

პროექტი, მეორე წელია, ფრიდრიხ ებერტის ფონდის მხარდაჭერით ხორციელდება.

ტრენინგები უკვე ჩატარდა საქართველოს 8 რაიონში. სამცხე–ჯავახეთის შემდეგ ქვემო ქართლში გაიმართება.

წლის ბოლოს, არასამთავრობო ორგანიზაცია შემაჯამებელ კონფერენციას გამართავს და მონაწილეებს სერთიფიკატებს გადასცემს.

[ნანა მიქელაძე, ახალციხე]