ახალციხეში ქალ პოლიტიკოსებს საარჩევნო კამპანიის წარმოებას ასწავლიან

ტრენინგი ასოციაციის „ქალი და განვითარება“ , პროექტის „ქალთა გაძლიერება თანასწორი მონაწილეობისათვის“ ფარგლებში, ახალციხის დემოკრატიული ჩართულობის ცენტრში ტარდება. ორდღიანი სწავლების პირველი დღე თეორიას ეთმობა, მეორე დღეს კი ქალი კანდიდატები ამომრჩეველების წინაშე წარდგომის მეთოდებსა და ხერხებს შეისწავლიან.

ტრენინგს ახალციხის მუნიციპალიტეტის მასშტაბით არჩევნებში მონაწილე ქალები, როგორც მაჟორიტარები, ასევე პროპორციული სიის წევრები ესწრებიან. სწავლებას ასევე ესწრება ახალციხის მერობის კანდიდატი ნატალია სისვაძე.

ასოციაციის გამგეობის თავმჯდომარე ფატი ბუხრიკიძე ამბობს, რომ პროექტის სამიზნე რეგიონები სამცხე–ჯავახეთი და შიდა ქართლია. რეგიონები შემთხვევით არ შერჩეულა. პროექტს წინ უძღოდა კვლევა, რომელმაც აჩვენა, რომ ამ რეგიონებში, საზოგადოებრივ–პოლიტიკურ პროცესებში, ქალების დაბალი ჩართულობაა.

მისივე თქმით, სამცხე–ჯავახეთიდან პროექტში ახალციხის გარდა ახალქალაქი და ნინოწმინდაა ჩართული. დაგეგმილია გასვლითი, საინფორმაციო შეხვედრები სომხურ თემებში: „შევხვდებით ქალთა ჯგუფებს, ამომრჩევლებს, რათა გაიზარდოს მათი ცნობიერება საარჩევნო პროცესების მიმართ და საკუთარი უფლებების მიმართ. ჩვენი მიზანია გავააქტიუროთ კონკრეტული აქტივისტი ქალები, რათა შემდგომში მათ იმუშაონ ქალების გასააქტიურებლად მათ თემში, სოფელში, ან მათ საცხოვრებელ გარემოში“.

გარდა ამისა, პროექტის ფარგლებში სამცხე–ჯავახეთში 4 მრგვალი მაგიდა ჩატარდება. 2 ახალციხეში, 1 ახალქალაქში და 1 ნინოწმინდაში. შეხვედრას პარტიებისა და სამოქალაქო სექტორის წარმომადგენლები დაესწრებიან.

„მრგვალ მაგიდებზე განვიხილავთ რა პრობლემები არსებობს ქალთა თანასწორი მონაწილეობისათვის საარჩევნო პროცესში, როგორც ამომრჩევლებისათვის, ისე კანდიდატებისთვის“, – ამბობს ფატი ბუხრიკიძე.

პროექტი „ქალთა გაძლიერება თანასწორი მონაწილეობისათვის“ , რომელიც საარჩევნო სისტემების განვითარების, რეფორმებისა და სწავლების ცენტრის მიერაა დაფინანსებული, 16 მაისს დაიწყო და 14 ივნისს დასრულდება.

[ნინო ნარიმანიშვილი, ახალციხე]