სამცხე-ჯავახეთის ყოფილ პატიმრებს ბიზნესის წარმოებას ასწავლიან

ტრენინგები დღეს დაიწყო და ოთხი დღის განმავლობაში გაგრძელდება. ტრენინგები ასოციაცია ”ტოლერანტის”, ევროკავშირის მიერ დაფინასებული პროექტის, „ყოფილი პატიმრების ინტეგრაციისა და რეაბილიტაციის ხელშეწყობა სამცხე-ჯავახეთის რეგიონში“, ფარგლებში ტარდება.

ტრენინგს თბილისიდან მოწვეული GPG ტრენინგის კურსის კოორდინატორი, როინ ხინთიბიძე და ბიზნეს-ტრენერი, ქეთევან ხმალაძე უძღვებიან.

,,საკმაოდ საინტერესო აუდიტორია დამხვდა, არ მოველოდი, აქტიურები არიან. ისეთ კითხვებზე გამცეს პასუხები, რაც ჩემმა სტუდენტებმაც კი არ იციან“, - ამბობს ტრენერი, როინ ხინთიბიძე.

პირველი დღის ტრენინგის მთავარი სლოგანია - ბიზნესში მთავარია დათვლა. რადგან ტრენინგზე მყოფი ყოფილი პატიმრების უმეტესობას მცირე ბიზნესი აქვს, ტრენინგი კითხვა-პასუხისა და კონსულტაციების რეჟიმში მიმდინარეობს.

”ინტერესი მაქვს, რომ მეტი ვისწავლო და მეტი გავიგო. მეც პატარა ბიზნესი მაქვს. ფინანსების გამოთვლა უკვე გავიარეთ”, - გვეუბნება ერთ-ერთი ყოფილი პატიმარი.

ტრენინგების გავლის შემდეგ მონაწილეები სპეციალურ სერთიფიკატებს მიიღებენ.

[Sknews.ge]