‘ერთსულოვნება’ ახალციხეში მოსამზადებელ ფორუმს გამართავს

კონფერენცია ახალციხის დემოკრატიული ჩართულობის ცენტრში გაიმართება. დასწრება ნებისმიერ მსურველს შეუძლია.

საზოგადოებრივ და არასამთავრობო ორგანიზაციათა გაერთიანება, კოალიცია „ერთსულოვნება“ ა/წ სექტემბერში გეგმავს დიდი საზოგადოებრივი შეკრება-ფორუმის ჩატარებას.

„სადაც მიიღება რეზოლუცია, ქვეყანაში ყველაზე აქტუალური საკითების დაუყოვნებლივ გადაწყვეტის შეძახილით და დაიწყება სამოქალაქო აქტივობის მნიშვნელოვანი ფაზა. უპირველესად გვინდა მოვითხოვოთ, ქვეყანაში შეიქმნას საზოგადოებრივ და უწყებათაშორისი საკოორდინაციო კომისია, რომელიც მნიშვნელოვანი პროექტებისა და წინადადებების წარმოდგენისა და განხილვის შესაძლებლობას შეუქმნის სამოქალაქო საზოადოებას და რომელიც მიღებულ გადაწყვეტილებებს რეკომენდაციების სახით მიაწვდის შესაბამის უწყებებს“, – აცხადებენ „ერთსულოვნებაში“.

როგორც ორგანიზატორები განმარტავენ, ფორუმზე, საქართველოს სამოქალაქო საზოგადოების მხრიდან, ხელისუფლებისადმი მიმართულ რეზოლუციაში საკითხების შერჩევის მიზნით, კოალიცია „ერთსულოვნება“ იწყებს, მთელი საქართველოს მასშტაბით წინა მოსამზადებელი კონფერენციების ჩატარებას. თანამშრომლობის მიზნით დასასწრებად იწვევს ყველა დაინტერესებულ ორგანიზაციას თუ პირს, რომლებსაც მიეცემათ შესაძლებლობა წარადგინონ თავიანთი ხედვები იმის შესახებ:
- რა პრობლემები არსებობს ქვეყანაში;
- ყველაზე უმთავრესი რა არის გამოსასწორებელი;
- როგორ არის შესაძლებელი ყოველივეს გამოსწორება.

ყველა დაინტერესებულ პირს, ვისაც სურთ ფორუმში ჩართვა, ან/და სიტყვით გამოსვლა, ან საკითხის რეზოლუციაში შეტანა, „ერთსულოვნება“ მიმართავს, დაესწროს მოსამზადებელ კონფერენციებს და წერილობით წარადგინოს თავისი წინადადება, შეძლებისდაგვარად ერთ გვერდზე. აუცილებლად საკონტაქტო რეკვიზიტების მითითებით. მსურველებს შეუძილიათ წინადადებები გააგზავნონ ელექტრონული ფოსტის მეშვეობით: ersaufle@yahoo.com

„ერთად შევიმუშავოთ სარეზოლუციო მიმართვის პროექტი და მასში შემავალი საკითების ნუსხა და ერთად ჩავატაროთ დიდი შეკრება-ფორუმი, რომელითაც სამოქალაქო აქტივობის ახალი ფაზა დაიწყება“, – აცხადებს კოალიცია „ერთსულოვნების“ თავმჯდომარე მიხეილ ანდღულაძე.

[sknews.ge]