სამოქალაქო სექტორსა და პარლამენტს შორის მემორანდუმი ფორმდება

შეხვედრა ქუთაისში, საქართველოს პარლამენტში შედგება. ახალციხიდან პარლამენტში ორი ორგანიზაცია ‘დემოკრატ მესხთა კავშირი’ და ასოციაცია ‘ტოლერანტია’ მიწვეული.

ღონისძიების ორგანიზატორი სამოქალაქო საზოგადოების ინსტიტუტი, ფონდი ღია საზოგადოება საქართველო და აღმოსავლეთ–დასავლეთის მართვის ინსტიტუტია. მათი განცხადებით, საზოგადოებრივ ორგანიზაციებსა და საქართველოს პარლამენტს შორს მსგავსი თანამშრომლობის დამკვიდრების იდეა გასული წლის შემოდგომით გაჩნდა. დღევანდელი დღით კი საფუძველი ეყრება საზოგადოებრივი ორგანიზაციების დღეს საქართველოს პარლამენტში, რომელიც ყოველწლიურად გაიმართება და უზრუნველყოფს საზოგადოებრივ ორგანიზაციებსა და პარლამენტს შორის დიალოგის გაღრმავებას.

ამ დღეს საზოგადოებრივ ორგანიზაციებს საშუალება ექნებათ პარლამენტარებთან ერთად იმსჯელონ ქვეყნის წინაშე მდგარი მნიშვნელოვანი პრობლემების, ამოცანების და საჯარო პოლიტიკის მიმართულებების შესახებ.

საქართველოს პარლამენტის თავმჯდომარის თხოვნის შედეგად, საზოგადოებრივი ორგანიზაციების წარმომადგენელთა ჯგუფმა მემორანდუმის ტექსტი მოამზადა, რომელიც ორივე მხარის ერთობლივი მუშაობით დაიხვეწა. სწორედ დღეს მოეწერება ხელი აღნიშნულ მემორანდუმს. დღესვე ორგანიზაციებს მიეცემათ საშუალება დააყენონ ქვეყნის წინაშე მდგარი პრობლემები და პარლამენტს შესთავაზონ მისი გადაწყვეტის გზები.

როგორც ორგანიზატორები ამბობენ, მემორანდუმთან მიერთება საქართველოში მომუშავე ნებისმიერ საზოგადოებრივ ორგანიზაციას შეუძლია.

[sknews.ge]