სამოქალაქო ჩართულობის ხელშეწყობის მიზნით სამცხე–ჯავახეთში 20 ახალგაზრდა შეირჩევა

ზრდასრულთა განათლების ქსელი, კრეატიული განვითარების ცენტრის ფრიდრიხ ებერტის ფონდის სამხრეთ კავკასიის წარმომადგენლობის მხარდაჭერით, ახალ პროექტს იწყებს: „სამოქალაქო ჩართულობის ხელშეწყობა საქართველოს რეგიონებში“.

პროექტის მთავარი მიზანია რეგიონებში სამოქალაქო აქტივიზმის შესახებ ცნობიერების ამაღლება ინოვაციური მეთოდების, კერძოდ კი ფორუმ თეატრის გამოყენებით.

“ფორუმ–თეატრი არის მინი სპექტაკლი, 10-15 წუთიანი, რომელიც მიზნად ისახავს პრობლემის თვალნათლივ წარმოჩენას მაყურებლისთვის და მათთან ერთად გამოსვლის ძიებას. ფორუმ თეატრის სპეციფიკიდან გამომდინარე, მსახიობები სპექტაკლს ორჯერ თამაშობენ. მას შემდეგ რაც ხელახლა დაიწყება მოქმედება, თითოეული მაყურებელი, მსახიობებთან ერთად ხდება სპექტაკლის მონაწილე და ერთ–ერთი გმირი. მათ შეუძლიათ შეცვალონ ნებისმერი სცენა, შეაჩერონ მოქმედება და წარმართონ სპექტალი სასურველი მიმართულბით. ეს ყველაფერი მნიშვნელლოვანია იმისთვის, რომ თითოეულმა დაინახოს და გააცნობიეროს, რამხელა როლი და პასუხისმგებლობა აქვთ მათ ამ საქმეში", აცხადებენ პროექტის ორგანიზატორები.

ფორუმ–თეატრი, ეს არის თეატრალური მეთოდოლოგია, რომელიც შეიმუშავა ბრაზილიელმა რეჟისორმა აუგუსტო ბოალმა, და დღეს აქტიურად გამოიყენება სამოქალაქო განათლებაში და ზოგადად სამოქალაქო ჩართულობის გაძლიერებისათვის.

ამ მიზნის მისაღწევად თითოეულ რეგიონში შეირჩევა 20-20 მონაწილე, 18–დან 30 წლამდე ახალგაზრდები, რომლებსაც მიეცემათ შესაძლებლობა:

-გაიარონ კვალიფიკაციის ასამაღლებელი ტრენინგი: სამოქალაქო აქტივიზმი და ფორუმ თეატრი როგორც ინოვაციური მეთოდოლოგია
-დაგეგმონ და განახორციელონ ფორუმ თეატრი საკუთარ რეგიონში ადგილობრივ ახალგაზრდობასთან
-წარმოადგინონ მიღწეული შედეგები შემაჯამებელ ღონისძიებაზე პროექტის დასასრულს.

მსურველთა რეგისტრაცია 20 მაისამდეა შესაძლებელი.

[sknews.ge]