30 თუნუქი და 10 ტომარა ცემენტი – დახმარება სოციალურად დაუცველ ოჯახს

ადიგენის მუნიციპალიტეტის სოფელ უტყისუბანში მცხოვრებ მამულაძეებს შესაძლოა ზამთარის გატარება ისევ დაზიანებული სახურავით მოუწიოთ. ოჯახის დიასახლისი ამბობს, რომ თუნუქის ის რაოდენობა, რაც ადიგენის გამგეობამ გადასცათ, გადასახურად საკმარისი არ არის.

„30 თუნუქი ძალიან ცოტაა, ნახევარ სახლსაც არ ეყოფა. თან ისეთი თხელია, სეტყვასაც კი ვერ გაუძლებს“, – ამბობს ია მამულაძე.

მისი თქმით, ადიგენის გამგეობაში განუცხადეს, რომ დახმარება ძალიან ბევრ ადამიანს სჭირდება და მთლიანი სახლისთვის საკმარის თუნუქს ვერ მისცემდნენ:„წვიმის დროს ოთახის ერთ კუთხეში ვიყუჟებით, რომ არ დავსველდეთ. მეუბნებიან რაც დააკლდა, თქვენ თვითონ დაამატეთო. ბავშვების საჭმელი არ მაქვს და სახურავისთვის თუნუქს, როგორ შევიძენ? ძალიან გვიჭირს არ ვიცი რა გვეშველება“.

მამულაძეებს სახლის გადასახურად არც ხე–მასალა აქვთ: „ჯერ ნებართვა არ მოუციათ“.

ადიგენის მუნიციპალიტეტის გამგეობაში განმარტავენ, რომ ის ოჯახები, ვინც დაწერა განცხადება ხე–მასალით დახმარებასთან დაკავშირებით, სპეციალურმა კომისიამ უკვე შეამოწმა. შესაბამისი დოკუმენტები გადაგზავნილია სამცხე–ჯავახეთის სამხარეო ადმინისტრაციაში, თუმცა პასუხი ჯერ არ მოსულა.

სამცხე–ჯავახეთის სამხარეო ადმინისტრაციაში განმარტავენ, რომ მამულაძეების ოჯახს 20 კუბური მეტრი სამასალე მერქანი 2014 წელსაც გამოუყვეს, თუმცა ოჯახმა მასალა სახლის რეაბილიტაციას არ მოახმარა.

„შეგვიძლია ვივარაუდოთ რომ, კომერციული მიზნით მოხდა მასლის გამოყენება. 2015 წელს შემოსული განცხადების საფუძველზე სამხარეო ადმინისტრაციის შესაბამისმა კომისიამ შეისწავლა აღნიშნული ოჯახის პრობლემა და მიმდინარე წელსაც 6 მცირეწლოვანი ბავშვის მდგომარეობის გათვალისწინებით, უახლოეს ხანში სატყეო სააგენტოში მათ გაეწევათ შუამდგომლობა სამასალე მერქნის გამოყოფის თაობაზე“, – აცხადებენ გუბერნიაში.

[თინათინ ზაზაძე, ადიგენი]