მოხეში ხანძრისგან დაზარალებულ შავაძეებს გამგეობა თუნუქით და ცემენტით დაეხმარა

ადიგენის მუნიციპალიტეტის გამგეობაში განმარტავენ, რომ შავაძეებს ცემენტისა და თუნუქის წაღება ნებისმიერ დროს შეუძლიათ.

რამდენი ლარი გამოიყო ადგილობრივი ბიუჯეტიდან შავაძეების დასახმარებლად, გამგეობის პრესსამსახურის წარმომადგენელს მამუკა კალანდაძეს ინფორმაცია არ აქვს: :მარტო შავაძების მოთხოვნა არ იყო, სხვაც ითხოვდა ცემენტით დახმარებას და მთლიანი შესყიდვა გავაკეთეთ. რამდენი ლარი დაიხარჯა შავაძეების დასახმარებლად, ზუსტად არ ვიცი“.

მისი თქმით, ბადრი შავაძემ მისსავე ეზოში ახალი სახლის მშენებლობა დაიწყო: „გამგებელი იყო გუშინ მოხეში ასული. ახალ სახლს აშენებენ დამწვარი სახლის ახლოს, საძირკველი და პირველი სართული უკვე ამოყვანილია“.

ბადრი შავაძე ამბობს, რომ ცემენტი და თუნუქი სახლის გადასახურად საკმარისია. შავაძეებს სახლის აშენებაში მეზობლები და ნათესავები ეხმარებიან.

ამ დროსთვის შავაძეების 7–სულიანი ოჯახი დროებით მეზობელთან ცხოვრობს.

„სახლს სანამ ავაშენებთ, მეზობელთ ან მოგვისწევს ცხოვრება“, – ამბობს ბადრი შავაძე.

შეგახსენებთ, რომ მოხეში მცხოვრებ შავაძეებს 23 სექტემბერს ღამით გაჩენილმა ხანძარმა სახლი და საქონლის სადგომი მთლიანად გაუნადგურდა. ხანძრის დროს საქონლის სადგომში დაიწვა 27 სული საქონელი. მეზობლებმა ვერაფრის გადარჩენა შეძლეს. 5 შვილიანი ოჯახი ღიაცისქვეშ დარჩა. ხანძრის შედეგად ბავშვებს სასკოლო ნივთებიც დაეწვათ. ახალი სახელმძღვანელოები დაზარალებულ მოსწავლეებს მოხის საჯარო სკოლის ადმინისტრაციამ გადასცა.

[თინათინ ზაზაძე, ადიგენი]