უტყისუბანში მრავალშვილიან ოჯახს ადიგენის გამგეობა თუნუქითა და ცემენტით დაეხმარება

მამულაძეების სოციალურად დაუცველ მრავალშვილიან ოჯახს, რომლის პრობლემების შესახებაც „სამხრეთის კარიბჭე“ წერდა, ადიგენის მუნიციპალიტეტის გამგეობა ნახევარი ტონა ცემენტით და 30 თუნუქის სახურავით დაეხმარა. თვითმმართველობაში განმარტავენ, რომ მამულაძეებს კუთვნილი სამშენებლო მასალების წაღება უკვე შეუძლიათ.

„დასკვნა გაკეთებულია. იმ მაღაზიას, რომელთანაც ხელშეკრულება გვაქვს გაფორმებული, სამშენებლო მასალების სია უკვე გადავეცით“, - ამბობს გამგებლის თანაშემწე და ასევე სოციალურ საკითხთა და ბენეფიციართა განცხადებების შემსწავლელი კომისიის თავმჯდომარე ზაზა ჩილინგარაშვილი.

მისივე თქმით, ის 30 თუნუქი, რომელიც მუნიციპალიტეტმა მამულაძეებს გადასცა სახლის მთლიანად გადასახურად, საკმარისი არ არის, თუმცა ამ ეტაპზე მეტის გაცემის საშუალება არ არის.

რამდენი ლარი გამოიყო ადგილობრივი ბიუჯეტიდან მამულაძეების დასახმარებლად უცნობია.

„არ ვიცი, ეს დასათვლელია. ახლა არ მცალია კომისიის სხდომაზე შევდივარ“, – აცხადებს ჩილინგარაშვილმა.

სოციალურად დაუცველი მამულაძეები ადიგენის მუნიციპალიტეტის სოფელ უტყისუბანში ორი წელია, ექვს შვილთან ერთად უკიდურეს გაჭირვებაში ცხოვრობენ. დაზიანებული სახურავის გამო სახლში ისე წვიმს, როგორც გარეთ. ოჯახმა დახმარება ადგილობრივ თვითმმართველობას სთხოვა.

[თინათინ ზაზაძე, ადიგენი]