უსახლკაროდ დარჩენილი მერაბიშვილები სამასალე მერქანს ითხოვენ

ხანძრისგან უსახლკაროდ დარჩენილ მერაბიშვილებს ადიგენის მუნიციპალიტეტის გამგეობამ 10,5 ტონა ცემენტი გამოუყო. ადიგენის მუნიციპალიტეტის გამგებლის მოვალეობის შემსრულებელი არსენ ბალახაშვილი ამბობს, რომ ოჯახს ნებისმიერ დროს შეუძლია ადიგენის მუნიციპალიტეტის გამგეობას მიაკითხოს და კუთვნილი ცემენტი წაიღოს.

მერაბიშვილებმა გამგეობას საკვები პროდუქტებითა და სამშენებლო ხე-მასალით დახმარებაც სთხოვეს. არსენ ბალახაშვილის თქმით, პროდუქტით გამგეობა მათ ახლო მომავალში დაეხმარება, რაც შეეხება სამასალე მერქნით დახმარებას, ეს მათზე დამოკიდებული არ არის.

„სამშენებლო ხე-მასალის გამოყოფაზე მოთხოვნა სამცხე-ჯავახეთის სამხარეო ადმინისტრაციაში უკვე გაგზავნილი გვაქვს. გუბერნიამ შუამდგომლობა უნდა გაგვიწიოს სამცხე-ჯავახეთის სატყეო სამსახურთან. პასუხი არ მოგვსვლია“, - ამბობს არსენ ბალახაშვილი.

სამცხე-ჯავახეთის სამხარეო ადმინისტრაციის პრესსამსახურის ია გოგატიშვილის თქმით, ადიგენის მუნიციპალიტეტიდან 60 კუბურ მეტრ სამშენებლო ხე-მასალაზე მოთხოვნა მიღებულია. აღნიშნული განცხადება 26 სექტემბერს სამცხე-ჯავახეთის სატყეო სამსახურს გადეგზავნა.

ადიგენის სატყეო სამსახურის უფროსი მეტყევის სოსო რეხვიაშვილის თქმით, მიღებისთანავე განცხადება თბილისში სატყეო დეპარტამენტში გადაიგზავნა.

„პასუხი ჯერ არ მოგვსვლია, ველოდებით ყოველ დღე. როგორც კი დეპარტამენტი აღნიშნულ განცხადებას დააკმაყოფილებს, დაზარალებულ ოჯახს ვაცნობებთ, რის შემდეგადაც მათ შეეძლებათ კუთვნილი სამშენებლო ხე-მასალის წაღება“,-ამბობს სოსო რეხვიაშვილი.

შეგახსენებთ, ადიგენის მუნიციპალიტეტის სოფელ უდეში მცხოვრებ მერაბიშვილების საცხოვრებელ სახლს ცეცხლი 18 სექტემბერს გაუჩნდა. ექვსსულიანი ოჯახი უსახლკაროდაა დარჩენილი და დროებით ნათესავის ბინაში ცხოვრობს. მერაბიშვილებს საცხოვრებლის გარდა ეზოში ხეხილი, ვენახი და აღებული მოსავალიც დაეწვათ.

ოჯახი ადგილობრივ ხელისუფლებას სამშენებლო მასალის დროულად გადაცემას სთხოვს.

[მანანა სარაშვილი, ახალციხე]