ხარჯამის სასაფლაოზე მცხოვრები ალავიძეები დახმარებას ითხოვენ

ადიგენის მუნიციპალიტეტის სოფელ ხარჯამში მცხოვრები ეთერ ალავიძე ორ შვილთან ერთად ღია ცის ქვეშ არის დარჩენილი. ხის სახლში, რომელიც სოფლის სასაფლაოზე აქვთ ცხოვრება შეუძლებელია, რადგან დაზიანებული სახურავის გამო წყალი ოთახებში ჩადის. ოჯახი დროებით ნათესავთან ცხოვრობს.

ეთერ ალავიძე დახმარებას ადგილობრივ თვითმმართველობას და მხარის გუბერნატორს აკაკი მაჭუტაძეს სთხოვს.

„ყურადღებას არავინ გვაქცევს. ვიდრე არჩევნები ჩატარდებოდა ყოველდღე მოდიოდნენ ხმები რომ წაეღოთ, ახლა არავის ვახსოვართ. უკიდურეს გაჭირვებაში ვართ“, – ამბობს ოჯახის დიასახლისი ეთერ ალავიძე.

სამცხე–ჯავახეთის სამხარეო ადმინისტრაციაში განმარტავენ, რომ ეთერ ალავიძემ დახმარების თხოვნით გუბერნატორს გასული წლის მაისში მიმართა, წერილი რეაგირებისთვის ადიგენის მუნიციპალიტეტს გადაეგზავნა. როგორც საზოგადოებასთან ურთიერთობის სპეციალისტი ია გოგატიშვილი განმარტავს, ალავიძეების ოჯახს დახმარება გაეწია.

ეთერ ალავიძე ადასტურებს, რომ ადგილობრივი თვითმმართველობისგან დახმარება ნამდვილად მიიღო, თუმცა გაჭირვების გამო სახლის გადასახურად გამოყოფილი თუნუქი გაყიდა:“ ჩემს შვილს ხერხემალზე რთული ოპერაცია გავუკეთეთ ღუდუშაურში. რეაბილიტაციისთვის თბილისში ჩასვლა ხშირად გვიწევდა, რადგან თანხა არ მქონდა იძულებული გავხდი გამეყიდა“,–ამბობს იგი.

ადიგენის მუნიციპალიტეტის გამგებელი ზაქარია ენდელაძე ამბობს, რომ ალავიძეების ოჯახს უკვე დაეხმარნენ და ყოველწლიურად ერთიდაიგივე მოთხოვნაზე ვერ დაეხმარებიან.

„რომ მოგცემენ სახურავს იმისთვის უნდა გამოიყენო რისთვისაც მოგცეს.თუ სამედიცინო დახმარება სჭირდებოდა, ამ კუთხით უნდა მოემართა“, – აცხადებს ზაქარია ენდელაძე.

რა ბედი ეწევა სოციალურად დაუცველ ოჯახს, რომლის ერთადერთი შემოსავალი 157 ლარია უცნობია.

[თინათინ ზაზაძე, ახალციხე)