უსახლკაროდ დარჩენილ მერაბიშვილებს სამასალე მერქანი ამ დრომდე არ მიუღიათ

ოჯახის უფროსმა ელიზბარ მერაბიშვილმა ადგილობრივ გამგეობაში სამშენებლო ხე-მასალის მოთხოვნაზე განცხადება ხანძრის გაჩენიდან რამდენიმე დღეში დაწერა. აღნიშნული განცხადებით, მერაბიშვილი გამგეობას სამასალე მერქნის დროულად გადაცემას სთხოვდა, რადგან ზამთრის დადგომამდე ოჯახს საკუთარი სახლი ჰქონოდა.

ადიგენის მუნიციპალიტეტის გამგებლის მოვალეობის შემსრულებლის არსენ ბალახაშვილის თქმით, აღნიშნული ოჯახის განცხადებაზე დადებითი ან უარყოფითი პასუხი თბილისის სატყეო დეპარტამენტიდან ადიგენის სატყეო სამსახურში უნდა მივიდეს. ადიგენის სატყეოში კი ამბობენ, რომ პასუხი ჯერ არ მიუღიათ.

რატომ იგვიანებს მერაბიშვილების განცხადებაზე პასუხი ვერც ადიგენის გამგეობაში და ვერც ადიგენის სატყეო სამსახურში აკონკრეტებენ. როგორც არსენ ბალახაშვილმა „სამხრეთის კარიბჭესთან“ 7 ოქტომბერს სატელეფონო საუბარში განაცხადა, მერაბიშვილების განცხადება სამცხე-ჯავახეთის სამხარეო ადმინისტრაციაში მალევე გადააგზავნა. სამცხე-ჯავახეთის სამხარეო ადმინისტრაციამ კი 60 კუბურ მეტრ სამშენებლო ხე -მასალაზე მოთხოვნა 26 სექტემბერს სამცხე-ჯავახეთის სატყეო სამსახურს გადაუგზავნა. როგორც ადიგენის სატყეო სამსახურის უფროსი მეტყევე სოსო რეხვიაშვილი ირწმუნება აღნიშნული განცხადება თბილისის სატყეო დეპარტამენტში მიღებისთანავე გააგზავნეს.


შეგახსენებთ, რომ ადიგენის მუნიციპალიტეტის სოფელ უდეში მცხოვრები მერაბიშვილების საცხოვრებელ სახლს ცეცხლი 18 სექტემბერს გაუჩნდა. ექვსსულიანი ოჯახი უსახლკაროდაა დარჩენილი და ამ დრომდე ნათესავებთან ცხოვრობენ. მერაბიშვილებს სახლის გარდა ხეხილი, ვენახი და აღებული მოსავალიც დაეწვათ.

[მანანა სარაშვილი, ახალციხე]