ორი გარდაცვლილი, ერთი დაშავებული - ავარია აბასთუმანში, ახალი დეტალები

მსუბუქ ავტომანქანში მსხდომი 5 ადამიანიდან, ორი გარდაცვლილის გვამს პროზექტურაში ექსპერტიზა უტარდება, სამი დაშავებული კლინიკ "იმედშია" გადაყვანილი. როგორც "სამხრეთის კარიბჭეს" კლინიკაში უთხრეს, სამი დაშავებულიდან ორს უკვე მალე გაწერენ, ერთი კი სტაციონარში რჩება: "ორს პატარ-პატარა დაზიანებები ჰქონდა, როგორც ასეთ დროს ხდება ხოლმე. მესამეს მდგომარეობაც უკვე სტაბილურია, სიცოცხლისთვის საშიში არ არის და საავადმყოფოში რჩება".

ინფორმაცია იმის შესახებ, რომ გარდაცვლილებიდან ერთი დაშავებულის დედაა, მეორე კი ბიძა, „სამხრეთის კარიბჭეს“ დაშავებულის ახლობელმა დაუდასტურა. თავად დაშავებული საშუალო ასაკის მამაკაცი, პროფესიით ექიმია. მის ვინაობას ამ ეტაპზე შეგნებულად არ ვასაჯაროებთ.

აბასთუმანში მცხოვრებლების ვერსიით, ზეკარის უღელტეხილზე მომავალი ავტომანქანა ნაწვიმზე მოცურდა, მძღოლმა საჭე ვეღარ დაიმორჩილა და ხრამში გადავარდა.

„ჩამოატარა ევაკუატორმა მანქანა, არაფრად ვარგოდა. ექიმები და პოლიციელები იყვნენ შეკრებილი, ხალხი ახლოს არ მიგვიშვეს“, - გვითხრა სატელეფონო საუბარში ერთ-ერთმა ადგილობრივმა.

შეგახსენებთ, ავტოსაგზაო შემთხვევა აბასთუმანში დღეს, 21 ივნისს, ადგილობრივების ვერსიით, დაახლოებით 21:00 საათზე მოხდა. მსუბუქ ავტომობილში 5 ადამიანი ისხდა, ამათგან 2 ადგილზე გარდაიცვალა.

საქართველოს შინაგან საქმეთა სამინისტროს ინფორმაციით, მომხდარზე გამოძიება სისხლის სამართლის კოდექსის 276-ე მუხლის ე-5 ნაწილით მიმდინარეობს. აღნიშნული მუხლი გულისხმობს ავტომობილის, ტრამვაის, ტროლეიბუსის, ტრაქტორის ან სხვა მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც გამოიწვია ადამიანის სიცოცხლის მოსპობა. ისჯება თავისუფლების აღკვეთით ვადით ოთხიდან შვიდ წლამდე,თანამდებობის დაკავების ან საქმიანობის უფლების ჩამორთმევით ვადით სამ წლამდე.

[ნინო ნარიმანიშვილი, ახალციხე]