ერთი გარდაცვლილი, ერთი დაშავებული – ავარია აწყურთან [Video]

ავარია შუადღეს, დაახლოებით 15:30 საათზე მოხდა. "გალფის" ბენზინმზიდი ჯერ სადისტრუბუციო კომპანიის მიკროავტობუსს შეეჯახა, შემდეგ კი გადაბრუნდა. მძღოლი მანქანიდან გადმოვარდა და ადგილზე დაიღუპა.

მომხდარის შედეგად მსუბუქად დაშავდა მიკროავტობუსის მძღოლი. მას პირველადი დახმარება სასწრაფო დახმარების სამსახურმა აღმოუჩინა. როგორც აღნიშნულ სამსახურში აცხადებენ, ახალგაზრდა მამაკაცს სამედიცინო დაწესებულებაში გადაყვანა არ დასჭირდა.



გადაბრუნებული ბენზინმზიდიდან საწვავი ქუჩაში იღვრებოდა. სამაშველო სამსახურმა დაღვრილ ბენზინი წყლის ჭავლით გადარეცხა.

საქართველოს შინაგან საქმეთა სამინისტროს ინფორმაციით, მომხდარზე ძიება სისხლის სამართლის კოდექსის 276–ე მუხლის მე–5 ნაწილით დაიწყო, რაც გულისხმობს ტრანსპორტის მოძრაობის უსაფრთხოების ან ექსპლუატაციის წესის დარღვევას, რამაც გამოიწვია ადამიანის სიცოცხლის მოსპობა. ისჯება თავისუფლების აღკვეთით ვადით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

[ვარლამ წიკლაური, ოთარ აწყურელი, ახალციხე]