ავარია ახალციხეში – დაშავდა 2 მოქალაქე, დაიმტვრა 6 მანქანა

ფოტო: "სამხრეთის კარიბჭეს" არქივიდან

ავტოსაგზაო შემთხვევა ახალციხის გასასვლელში, ასპინძისკენ მიმავალ გზაზე, დაახლოებით 16:45 საათისთვის მოხდა.

როგორც შსს პრესსამსახურში განმარტავენ, „ჟიგულის“ მარკის ავტომობილი საპირისპიროდ მოძრავ „პიკაპს“ შეეჯახა. შეჯახების შედეგად ავტომანქანა მოსრიალდა და იქვე მაღაზიასთან მდგარი ოთხი მანქანა დააზიანა.

შემთხვევის შედეგად „ჟიგულში“ მსხდომი ორი მამაკაცი დაშავდა. დაშავებული მგზავრები სასწრაფო–სამედიცინო დახმარების ბრიგადამ კლინიკა „იმედში“ გადაიყვანა.

„სტაბილური მდგომარეობა აქვთ. ერთერთი პაციენტისთვის კომპიუტერული ტომოგრაფიის გადაღებაა საჭირო“, - ამბობს კლინიკა „იმედის“ ექიმი კობა გრიგალაშვილი.

ორივე მამაკაცი ამ დრომდე კლინიკაში რჩება.

შსს-ში განმარტავენ, რომ გამოძიება სსკ 276–ე მუხლის 1–ლი ნაწილით მიმდინარეობს. აღნიშნული მუხლი გულისხმობს "ავტომობილის, ტრამვაის, ტროლეიბუსის, ტრაქტორის ან სხვა მექანიკური ტრანსპორტის მოძრაობის უსაფრთხოების ან ექსპლუატაციის წესის დარღვევა იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება, – ისჯება ჯარიმით ან თავისუფლების შეზღუდვით ვადით სამ წლამდე ანდა თავისუფლების აღკვეთით იმავე ვადით, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ".

[თინათინ ზაზაძე ახალციხე]