დაბა აბასთუმანში 915 აბონენტს ელექტროენერგია არ მიეწოდება

18 ივნისს დაბა აბასთუმანში მოსულმა ძლიერმა წვიმამ ქვესადგური დატბორა, საიდანაც ელექტროენერგია მხოლოდ აბასთუმნის მოსახლეობას მიეწოდება.

"ენერგო–პრო ჯორჯიას" სამხრეთ საქართველოს ფილიალის საზოგადოებასთან ურთიერთობის სამსახურის სპეციალისტის გიორგი ბალახაშვილის განმრატებით, ამ დროისთვის ელექტროენერგია დაბა აბასთუმნის 915 აბონენტს არ მიეწოდება.

"დატბორილია და სადენები წყალშია მოხვედრილი და ამ ეტაპზე ელექტროენერგიის ჩართვა არ შეიძლება, სპეც–ტექნიკა უკვე გაგზავნილია და წუთი–წუთზე მივა ადგილზე, რომელიც გათხრის სადრენაჟო არხს, ამოიწურება წყალი, გაშრება და ვფიქრობთ, რომ დღის ბოლოსთვის შეგვეძლება აღვადგინოთ ელექტროენერგიის მიწოდება", – ამბობს ბალახაშვილი.

მისივე თქმით, გუშინ ელექტროენერგიის მიწოდება ადიგენის კიდევ რამდენიმე სოფელს შეუწყდა, რომლებიც ქვესადგური "ადიგენიდან" მარაგდება. თუმცა დილით ყველა დაზიანების ლიკვიდაცია მოხდა და ამ დროისთვის მხოლოდ დაბა აბასთუმნის მოსახლეობაა ელექტროენერგიის გარეშე დარჩენილი.

გუშინ ძლიერმა წვიმამ ადიგენში საგზაო ინფრასტრუქტურაც დააზიანა, რამდენიმე სოფელში წვიმამ გზებზე ნაშალი მიწა ჩამოიტანა. თუმცა, ადიგენის მუნიციპალიტეტის გამგეობაში განმარტავენ, რომ გუშინდელი სტიქია საგანგაშო არ იყო. შემთხვევის ადგილზე გაწმენდითი სამუშაოები ამ დრომდე მიმდინარეობს.

[თამარ თოთაძე, ადიგენი]