ახალციხესა და ნინოწმინდაში 500–მდე აბონენტს ელექტროენერგია არ მიეწოდება

სამცხე–ჯავახეთის რამდენიმე მუნიციპალიტეტში ძლიერი ქარი და წვიმა გუშინ, 3 ივნისს საღამოს 19:00 საათისთვის დაფიქსირდა. სტიქიის გამო მთელი ღამის განმავლობაში ელექტროენერგიის მიწოდება პერიოდულად ფერხდებოდა.

ენერგო–პრო ჯორიჯიას სამხრეთ საქართველოს ფილიალის საზოგადოებასთან ურთიერთობის სამსახურში განმარტავენ, რომ დაახლოებით 3 000–მდე აბონენტს ელექტროენერგია შეფერხებით მიეწოდებოდა. მათივე ინფორმაციით, ამ დროისთვის აბონენტების 90 პროცენტისთვის ელექტროენერგიის მიწოდება აღდგენილია. დარჩენილია მხოლოდ 500–მდე აბონენტი, რომლებსაც დენი უახლოესი ერთი საათის განმავლობაში ჩაერთვებათ.

"გუშინ საღამოს, ნინოწმინდის მხარეს დაიწყო ძლიერი წვიმა და ქარი, სტიქიის შედეგად ჩვენი აბონენტების ნაწილი დარჩა ელექტროენერგიის გარეშე, თუმცა ჩვენ მობილიზება გავუკეთეთ სერვის–ცენტრების ტექნიკურ ჯგუფებს, როგორც ნინოწმინდაში და ახალციხეში, ასევე ახალქალაქსა და ადიგენში. ჩვენი თანამშრომლები მთელი ღამის განმავლობაში მუშაობდნენ და ამ დროისთვის დაახლოებით 90 პროცენტი ჩართულია", – ამბობს ენერგო–პრო ჯორჯიას სამხრეთ საქართველოს ფილიალის საზოგადოებასთან ურთიერთობის სამსახურის სპეციალისტი გიორგი ბალახაშვილი.

[თამარ თოთაძე, ახალციხე]