სამცხე–ჯავახეთში 800–მდე აბონენტს ელექტროენერგია არ მიეწოდება

ახალციხეში ელექტროენერგია გუშინ, 21:30 საათზე სადენების დაზიანების გამო გამოირთო. მიზეზი ძლიერი ქარი გახდა.

„ენერგო–პრო ჯორჯიას“ სამხრეთ საქართველოს ფილიალის საზოგადოებასთან ურთიერთობის სამსახურის წარმომადგენელის გიორგი ბალახაშვილის განმარტებით, აბონენტების უმეტესობა ალტერნატიულ ხაზზე გადაირთო, თუმცა ამ დრომდე ქალაქში 50 აბონენტს დენი ისევ არ მიეწოდება.

„ერთი ტრანსფორმატორის მომხმარებელია ელექტროენერგიის გარეშე დარჩენილი, რომლის გადართვაც ვერ მოხერხდა“, – ამბობს გიორგი ბალახაშვილი.

მისი თქმით, გუშინდელი დღის შემდეგ ელექტროენერგია არ მიეწოდება ახალციხის მუნიციპალიტეტის რამდენიმე სოფელს, ჯამში 600 აბონენტს: „ელიაწმინდას და ურავლის თემის მოსახლეობას არ აქვს დენი. მიმდინარეობს აღდგენითი სამუშაოები. აქ სხვადასხვა სახის დაზიანებაა“.

„ენერგო–პრო ჯორჯიას“ სამხრეთ საქართველოს ფილიალის საზოგადოებასთან ურთიერთობის სამსახურში განმარტავენ, რომ ამ ეტაპზე რეგიონის მასშტაბით დანარჩენ მუნიციპალიტეტებს ელექტროენერგია შეუფერხებლად მიეწოდება, თუმცა დაზიანებებია ბაკურიანსა და ანდეზიტში. აქ დენის გარეშე 100–მდე აბონენტია დარჩენილი.

„აქ დილის საათებში გაითიშა ელექტროენერგია. აღდგენითი სამუშაოები მიმდინარეობს და შესაძლებელია უკვე ჩართეს კიდეც“, –ამბობს გიორგი ბალახაშვილი.

[თინათინ ზაზაძე, ახალციხე]