გუშინ ღამიდან ადიგენის მუნიციპალიტეტს შუქი არ აქვს

მთავარი → სამართალი » შემთხვევა 19.02.2016

ადიგენის მუნიციპალიტეტის 55 დასახლებიდან, ელექტროენერგია მხოლოდ ორს, კახარეთსა და დაბა აბასთუმანს მიეწოდება. დანარჩენი სოფლები და დაბა ადიგენიც ელექტროენერგიის გარეშეა დარჩენილი.

ენერგო–პრო ჯორჯიას" სამხრეთ საქართველოს ფილიალის საზოგადოებასთან ურთიერთობის სამსახურის წარმომადგენელის გიორგი ბალახაშვილის ინფორმაციით, დენის გათიშვა გუშინდელმა ძლიერმა ქარმა გამოიწვია. ამ ეტაპზე ელექტროენერგიის გარეშე 3000 აბონენტია დარჩენილი.

„რამდენიმე ანძაა მოტეხილი, უკვე მუშაობენ აღსადგენად. გარდა ამისა დაზიანებულია ორი ფიდერი, ამ ეტაპზე შემოვლითი სამუშაოები ტარდება, უშუალოდ უნდა ინახოს ის ადგილი, სადაც დაზიანებაა“, - ამბობს გიორგი ბალახაშვილი.

მისი თქმით, მუნიციპალიტეტის მასშტაბით მხოლოდ ერთი ფიდერია ჩართული და ელექტროენერგია მხოლოდ დაბა აბასთუმნისა და სოფელ კახარეთის მოსახლეობას მიეწოდება.

"ენერგო–პრო ჯორჯიაში" განმარტავენ, რომ ადიგენის მუნიციპალიტეტს ელექტროენერგიის მიწოდება დღის ბოლოს, ეტაპობრივად აღუდგება.

[თინათინ ზაზაძე, ადიგენი]