ადიგენში მოსახლეობის ნაწილს ელექტროენერგია ისევ არ მიეწოდება

ადიგენის მუნიციპალიტეტში 4 აგვისტოს, ძლიერი ქარის შედეგად დაზიანებული ელექრტოგადამცემი ხაზების აღდგენა ამ დრომდე მიმდინარეობს. "ენერგო–პრო ჯორჯიას" სამხრეთ საქართველოს ფილიალის საზოგადოებასთან ურთიერთობის სამსახურის სპეციალისტის გიორგი ბალახაშვილის განმარტებით, სოფლებში სარეაბილიტაციო სამუშაოები ამ წუთებშიც გრძელდება.

ელექტროენერგიის გარეშე 400–მდე აბონენტია დარჩენილი. ენერგოკომპანიაში აცხადებდნენ, რომ ელექტროენერგიის მიწოდება გუშინ, 5 აგვისტოს, დღის ბოლომდე აღდგებოდა, თუმცა ვერ მოხერხდა.

შეგახსენებთ, რომ ორი დღის წინ, ძლიერმა ქარმა ადიგენის მუნიციპალიტეტის სოფლებში ელექტროგადამცემი ხაზები დააზიანა, მწყობრიდან გამოვიდა დერცელის ფიდერი. ელექტროენერგიის მიწოდება შეუწყდა 1200 აბონენტს.

[თინათინ ზაზაძე, ადიგენი]