ადიგენის მუნიციპალიტეტში 1200 აბონენტს ელექტროენერგია არ მიეწოდება

ძლიერი ქარის გამო ადიგენის მუნიციპალიტეტის რამდენიმე სოფელში ელექტროენერგია, გუშინ, ოთხ აგვისტოს 16:00 საათისთვის გამოირთო. მიზეზი დერცელის ფიდერის დაზიანება გახდა, გარდა ამისა დაზიანებულია ელექტროსადენები.

"ენერგო–პრო ჯორჯიას" სამხრეთ საქართველოს ფილიალის საზოგადოებასთან ურთიერთობის სამსახურის სპეციალისტის გიორგი ბალახაშვილის განმრატებით, ამ დროისთვის ელექტროენერგია მუნიციპალიტეტის მასშტაბით 1200 აბონენტს არ მიეწოდება.

„დერცელის ფიდერზე იყო სერიოზული დაზიანება. გუშინ მობილიზებული იყო მთელი სამსახური, მაგრამ ვერ მოხერხდა სრულად შეკეთება. სამუშაოებს სავარაუდოდ დღის ბოლომდე დაასრულებენ“, – ამბობს გიორგი ბალახაშვილი.

მისი თქმით, რამდენიმე სოფელში დაზიანებული ფიდერი უკვე შეკეთდა.

სოფელ იჯარეთში იმყოფებოდა ადიგენის მუნიციპალიტეტის გამგებელი ზაქარია ენდელაძე, მან სოფლის მოსახლეობა და დაზიანებული ელექტროგადამცემი ხაზების სარეაბილიტაციო სამუშაოები მოინახულა.



[თინათინ ზაზაძე, ადიგენი]