ახალციხის საჯარო და კერძო სკოლებში 330 პირველკლასელი დარეგისტრირდა

ახალციხის პირველ საჯარო სკოლაში 87 პირველკლასელი დარეგისტრირდა. აქ 4 პარალელური კლასის გახსნა იგეგმება.

141 პირველკლასელი დარეგისტრირდა ახალციხის მეხუთე საჯარო სკოლაში. როგორც სკოლის დირექტორი ინგა ვარდიძე ამბობს იმ შემთხვევაში თუ განათლების სამინისტრო რეგისტრაციას კიდევ გამოაცხადებს აღნიშნულ სკოლას დამატებით 9 პირველკლასელის მიღების საშუალება აქვს. მეხუთე საჯარო სკოლაში ექვსი პარალელური კლასის გახსნა იგეგმება.

დამატებითი რეგისტრაციის გამოცხადების შემთხვევაში პირველკლასელებს მეორე საჯარო სკოლაშიც მიიღებენ. აღნიშნულ სკოლაში ამ ეტაპზე სულ 29 პირველკლასელია დარეგისტრირებული.

მეექვსე საჯარო სკოლაში 25 პირველკლასელი დარეგისტრირდა. როგორც სკოლის დირექტორი გია კაპანაძე ამბობს, გასული წლის მსგავსად, წელსაც სკოლაში ერთი კლასი გაიხსნება
ასევე ერთი კლასი გაიხსნება კერძო სკოლა „მზექაშიც“. აღნიშნულ სკოლაში სულ 14 პირველკლასელი დარეგისტრირდა.

34 პირველკლასელი დარეგისტრირდა მესამე საჯარო სკოლაში. როგორც სკოლის დირექტორი სვეტლანა არუთუნიანი ამბობს სკოლა დამატებით პირველკლასელებს ვეღარ მიიღებს.

შეგახსენებთ, რომ საქართველოს განათლებისა და მეცნიერების სამინისტროს გადაწყვეტილებით, წელს პირველ კლასში მხოლოდ იმ ბავშვებს მიიღებენ, ვისაც 6 წელი 14 სექტემბრის ჩათვლით უსრულდებათ. სამინისტროში ამბობენ, რომ კანონი გამონაკლისის დაშვებას არ ითვალისწინებს, ხუთი წლის ბავშვები სკოლებში არ დაიშვებიან.

ხუთი წლის ბავშვებს არც ახალციხის კერძო სკოლა „მზექაში“ მიიღებენ.

[მანანა სარაშვილი, ახალციხე]