პირველ ეტაპზე ახალციხის სკოლებში 130 პირველკლასელი დარეგისტრირდა

პირველკლასელთა რეგისტრაციის პირველი ეტაპი 2013 წლის 1 აპრილს დაიწყო და 19 აპრილამდე მიმდინარეობდა. პირველ ეტაპზე რეგისტაციას ის ბავშვები გადიოდნენ, ვისი და–ძმაც იმავე სკოლაში სწავლობს; ვისი მშობელიც სკოლის თანამშრომელია; ვისი ოჯახიდანაც ერთდროულად ორი ან მეტი ბავშვი შედის პირველ კლასში (ტყუპები, და–ძმები).

ამ მოსწავლეებმა ზოგადსაგანმანათლებლო დაწესებულებაში მოსწავლის ჩასარიცხად აუცილებელი დოკუმენტები უნდა წარადგინონ 2013 წლის 20 აპრილიდან 2013 წლის 24 აპრილის ჩათვლით.

ახალციხის საჯარო სკოლების დირექტორები ამბობენ, რომ პირველკლასელებს მომდევნო რეგისტრაციებზეც ელოდებიან.

”ამ ეტაპზე ჩვენს სკოლაში 50-მდე პირველკლასელი დარეგისტრირდა. ჯერ კიდევ ველოდებით, რადგან ეს რეგისტრაცია იმ ბაშვებისთვის იყო ვისი და-ძმაც ამ სკოლებში სწავლობენ. ეს პრივილეგია იმის გამო მიენიჭათ, რომ ხშირად ბავშვებს იმ სკოლაში სწავლა უნდოდათ სადაც საკუთარი და ან ძმა სწავლობდა, ან მშობელი მუშაობდა. თუმცა საბუთების შეტნას ვერ ასწრებდა, შემდეგ ადგილები ივსებოდა და ამ სკოლებში სწავლას ვეღარ ახერხებდნენ”, - ამბობს ახალციხის პირველ საჯარო სკოლის დირექტორი მაკა ჯანაშვილი.
მისივე თქმით, ამ ეტაპზე პირველკლასელთა დასარეგისტრირებლად მშობლები კიდევ აკითხავენ. გასულ წელს პირველ საჯარო სკოლაში 70 პირველკლასელი მიიღეს.

ახალციხის მეხუთე საჯარო სკოლაში ამჟამად რეგისტრაცია 48 პირველკლასელმა გაიარა. მესამე საჯარო სკოლაში 6-მა, მეექვსე საჯარო სკოლაში 9 პირველკლასელმა, მეორე საჯარო სკოლაში კი 7-მა.
მეორე საჯარო სკოლის დირექტორი მარინა ზედგინიძე განმარტავს, რომ ვისი დედმამიშვილიც ამ სკილაში სწავლობს მათ პირველ ეტაპზე დარეგისტრირება ვერ მოასწრეს, თუმცა მეორე ეტაპზე აუცილებლად დარეგისტრირდებიან.

”არიან ისეთი ბავშვები, რომლის დედმამიშვილები აქ სწავლობენ და რაღაც მიზეზების გამო დარეგისტრირება ვერ მოახერხეს. ზოგმა საბუთები ვერ შეაგროვა და სხვა მიზეზებიც აქვთ. მეორე ეტაპზე მათ არ შეექმნებათ პრობლემები და აუცილებლად დავარეგისტრირებთ”, - განმარტავს მარინა ზედგინიძე.

კერძო სკოლა ”მზექას” დირექტორის ბელა კაპანაძეს თქმით, მათ სკოლაში ამ ეტაპზე უფრო მეტი პირველკლასელი შევიდა ვიდრე წინა წელს ყავდათ.

”კერძო სკოლებში პირველკლასელთა დარეგისტრირება ჯერ არ არის დაწყებული, მაგრამ მშობლებმა საბუთები მაინც მოიტანეს, ამიტომ ჩვენვე დავარეგისტრირებთ მათ. ამ ეტაპზე 17 პირველკლასელის საბუთი გვაქვს”, - ამბობს ბელა კაპანაძე.

[ნუკა სტეფნაძე, ახალციხე]