ახალციხის კერძო და საჯარო სკოლებში 344 პირველკლასელი დარეგისტრირდა

რაც შეეხება კონკრეტულ სკოლებს, პირველ საჯარო სკოლაში 85 პირველკლასელია რეგისტრირებული, რომლებიც სამ პარალელურ კლასში ისწავლიან. მეორე საჯარო სკოლაში ქართულ და რუსულ სექტორზე 31 პირველკლასელი დარეგისტრირდა.

რაც შეეხება მესამე საჯარო სკოლას ამ ეტაპზე 41 პირველკლასელია დარეგისტრირებული და ისინი ორ პარალელურ კლასში გადანაწილდებიან. თუმცა სკოლის დირექტორის სვეტლანა არუთინიანის თქმით, 3–მა ბავშვმა რეგისტრაციის გავლა ვერ მოასწრო, მათ სკოლაში განცხადება უნდა შეიტანონ, რის შემდეგაც სკოლის ადმინისტრაცია განათლების სამინისტროსგან წერილობით მოითხოვს, რომ დამატებით ამ სამი ბავშვის მიღების უფლება მისცენ.

მეოთხე საჯარო სკოლაში, რომელიც საბარგო სადგურზე მდებარეობს და ოთხწლიანია, წელს 5 პირველკლასელი იქნება.

მეხუთე საჯარო სკოლაში 143 პირვეკლასელი 6 პარალელურ კლასში ისწავლის. რაც შეეხება მეექვსე საჯარო სკოლას, აქ 25 პირველკლასელია დარეგისტრირებული.

ახალციხეში არსებულ კერძო სკოლა „მზექამ“ კი წელს 14 პირველკლასელი მიიღო.

[თამარ თოთაძე, ახალციხე]