პირველ ეტაპზე ახალციხის სკოლებში 113 პირველკლასელი დარეგისტრირდა

ახალციხის მეხუთე საჯარო სკოლაში პირველ ეტაპზე რეგისტრაცია 45–მა პირველკლასელმა გაიარა. სკოლის დირექტორი, ინგა ვარდიძე ამბობს, რომ გასული წლის მსგავსად, მიმდინარე წელსაც სავარაუდოდ 6 პარალელური კლასი გაიხსნება.

30 პირველკლასელი დარეგისტრირდა ახალციხის პირველ საჯარო სკოლაში. აქ 4 პარალელური კლასის გახსნა იგეგმება.

7 ბავშვია დარეგისტრირებული მეექვსე საჯარო სკოლაში. როგორც სკოლის დირექტორი ზაზა თამარაშვილი ამბობს, სკოლა 25 მოსწავლეზე მეტს ვერ მიიღებს.

კერძო სკოლა „მზექაში“ ამ ეტაპზე 9 პირველკლასელია დარეგისტრირებული. მეექვსე სკოლის მსგავსად, აქაც ერთი კლასი გაიხსნება.

12 პირველკლასელია დარეგისტრირებული მეორე საჯარო სკოლაში, მესამე საჯარო სკოლაში კი ამ ეტაპზე რეგისტრაცია 10–მა პირველკლასელმა გაიარა.

შეგახსენებთ, რომ პირველკლასელთა რეგისტრაციის პირველი ეტაპი მიმდინარე წლის 23 აპრილს დაიწყო და 2 მაისს დასრულდა. ამ ეტაპზე სკოლებში ის მოსწავლეები დარეგისტრირდნენ: რომლის და-ძმაც სწავლობს ამ სკოლაში; რომლის მშობელიც სკოლის თანამშრომელია ან რომლის ოჯახიდანაც ერთდროულად ორი ან მეტი ბავშვი შედის პირველ კლასში.

მეორე ეტაპი, ონლაინ რეგისტრაცია, 2014 წლის 20 მაისს დაიწყება და 20 ივნისს დასრულდება. ის მოსწავლეები, რომლებიც ვერ დარეგისტრირდნენ პირველ ეტაპზე, განათლების მართვის საინფორმაციო სისტემის ვებგვერდზე ელექტრონულად გაივლიან რეგისტრაციას. მეორე ეტაპზე სკოლებში დოკუმენტაციების მიღება 23 ივნისიდან 4 ივლისის ჩათვლით იქნება შესაძლებელი.

[მანანა სარაშვილი, ახალციხე]