პირველ კლასში იმ ბავშვებს მიიღებენ, ვისაც 6 წელი 15 სექტემბრამდე უსრულდება

სამინისტროში ამბობენ, რომ კანონი გამონაკლისის დაშვებას არ ითვალისწინებს, ხუთი წლის ბავშვები სკოლებში არ დაიშვებიან.

თუმცა, როგორც განათლების სამინისტროს საზოგადოებასთან ურთიერთობის სამსახურის წარმომადგენელი ნატა ასათიანი ამბობს, ეს კერძო სკოლებს არ ეხებათ.
„კერძო სკოლები სწავლის დაწყების თარიღს თვითონ საზღვრავენ, მაგალითად რომელიმე კერძო სკოლაში სწავლა ოქტომბერში რომ დაიწყოს, შესაბამისად აქ პირველ კლასში ის ბავშვები მიირებიან ვისაც 6 წელი ოქტომბერში უსრულდებათ“, – ამბობს ნატა ასათიანი.

სამინისტროს ცნობით, საჯარო სკოლებში 2015-2016 სასწავლო წელი 10 სექტემბრის შემდეგ, პირველივე ორშაბათს, 14 სექტემბერს დაიწყება.
2014-2015 სასწავლო წელს „ზოგადი განათლების შესახებ“ კანონში იყო დაშვება, რომლის თანახმადაც სკოლაში შეიძლებოდა შესულიყვნენ ბავშვები, რომელთაც 6 წელი 2015 წლის 1 იანვრამდე უსრულდებოდათ, ან გავლილი ჰქონდათ მოსამზადებელი საფეხური და მათი ასაკი აღემატებოდა 5 წელს.

[მანანა სარაშვილი, ახალციხე]