სტიქიიდან მეორე დღეს, სამცხე–ჯავახეთის სახელმწიფო რწმუნებულმა აკაკი მაჭუტაძემ სტიქიით დაზარალებული მუნიციპალიტეტები საქართველოს რეგიონული განვითარებისა და ინფრასტრუქტურის სამინისტროსადა ადგილობრივი ხელისუფლების წარმომადგენლებთან ერთად მოინახულა.
„აწყურში შიდა გზებია გაფუჭებული, ღარები აქვს გზებს გაკეთებული დაახლოებით 50–60 სანტიმეტრის, რაც უნდა შეივსოს. კატასტროფული მდგომარეობა არ არის, ადიგენშიც იგივე მდგომარეობა, რაც ახალციხეში“, – ამბობს აკაკი მაჭუტაძე.
ღვარცოფმა აწყურში ცენტრალური გზა გადაკეტა. 11 ივნისი, 2015წ.მისივე თქმით, განსაკუთრებით ბორჯომი მუნიციპალიტეტია დაზარალებული, სადაც სასოფლო–სამეურნეო სავარგულებთან ერთად სერიოზული ზიანი მიადგა ინფრასტრუქტურას.
„ჩამოვიდნენ ინფრასტრუქტურის სამინისტროს კრიზისების მართვის სამმართველოს თანამშრომლები და ადგილზე სწავლობენ სიტუაციას. პარალელურად, მუშაობს ზარალის დამთვლელი კომისია. რადგან ფორსმაჟორული სიტუაციია, მივიღეთ გადაწყვეტილება, რომ სასწრაფოდ მოვიწვიოთ საპროექტო ფირმა და პარალელურად დაიწყოს მშენებლობები“, – აცხადებს სახელმწიფო რწმუნებული სამცხე–ჯავახეთის მხარეში.
რაც შეეხება სასოფლო სამეურნეო სავარგულებს, სამცხე–ჯავახეთის გუბერნატორი განმარტავს, რომ ვინც აგრო–დაზღვევის პროგრამაშია ჩართული, ზარალის 80 პროცენტი აუნაზღაურდება, ხოლო მათ, ვისაც მოსავალი დაზღვეული არ აქვს, სახელმწიფო ვერ დაეხმარება.
ადიდებულმა საკირულამ ბორჯომში გზის ნაწილი მოწყვიტა. 11 ივნისი, 2015წ. ბორჯომი„ვისაც დაზღვეული აქვს მიწის ნაკვეთები, მას ზარალს სახელმწიფო აუნაზღაურებს, სხვა შემთხვევაში არამგონია რომ ეს ზარალი ანაზღაურდეს. მთელი საქართველოს მასშტაბით სასოფლო–სამეურნეო სავარგულები განადგურებულია და სახელმწიფოს ამდენი რესურსი არამგონია ჰქონდეს“, – ამბობს აკაკი მაჭუტაძე.
შეგახსენებთ, გუშინ, 11 ივნისს, სტიქიამ ადიგენს, ახალციხესა და ბორჯომს შეუტია.
ადიგენში 5 სოფელი დაისეტყვა: დიდი და პატარა სმადა, ენთელი,
ლელოვანი და ამხერი. აქ ძირითადად სასოფლო–სამეურნეო სავარგულები განადგურდა და შინაური ფრინველი დაიხოცა. ასევე ნათესები განადგურდა
ახალციხის 8 სოფელში:
აწყურში, გიორგიწმინდაში, ფერსაში, მუგარეთში, კლდეში,
წნისში, გურკელსა და წინუბანში.
ბორჯომს კი გუშინ ძლიერი წვიმა უტევდა. აქ ტაძრისი, საკირე და დვირი დაზარალდა. ადიდებულმა მდინარე საკირულამ დააზიანა გზები, სასმელი წყლის სისტემები და ელექტროენერგიის გადამცემი ხაზები.
წვიმისგან მოვარდნილმა ნიაღვრებმა სოფელ ლელოვანში შინაური ფრინველი დაახრჩო. 11 ივნისი, 2015წ. სოფელი ლელოვანი.დღეს, 12 ივნისს, დილიდან, სამივე მუნიციპალიტეტში გაწმენდვითი და სტიქიის შედეგების სალიკვიდაციო სამუშაოები დაიწყო. იწმინდება გზები და მიმდინარეობს ელექტროგადამცემი ხაზების აღდგენა. სამივე მუნიციპალიტეტში დილიდან მუშაობენ ზარალის დამთვლელი კომისიები. დაზარალებული ადგილობრივები განადგურებულ ნათესებზე ჩივიან და ამბობენ, რომ თუ სახელმწიფო არ დაეხმარათ, შემოდგომით საკვების გარეშე დარჩებიან.
[თამარ თოთაძე, ნინო ნარიმანიშვილი, სამცხე–ჯავახეთი]