ბორჯომში სტიქიამ ინფრასტრუქტურა დააზიანა

ადიგენისა და ახალციხის მუნიციპალიტეტების გარდა 11 ივნისს სტიქიამ ბორჯომის მუნიციპალიტეტიც დააზარალა. ბორჯომის ოთხ სოფელში დვირში, საკირეში, ტაძრისსა და დგვარში სოფლამდე მისასვლელი გზები დაზიანდა, დაიტბორა ქუჩები და განადგურდა ნათესები.

ძლიერი წვიმის გამო მდინარე დვირულა ადიდდა და სახლები დატბორა. ადიდებულმა მდინარემ ტაძრისი–დგვარის დამაკავშირებელი ხიდიც წაიღო. ადგილზე მობილიზებულია შესაბამისი ტექნიკა და მიმდინარეობს გაწმენდითი სამუშაოები.

ბორჯომის მუნიციპალიტეტში სტიქიის შედეგად დაზარალებული სოფლები მოინახულა სამცხე–ჯავახეთის გუბერნატორმა. ასევე შემთხვევის ადგილზე იმყოფებიან საქართველოს რეგიონული განვითარებისა და ინფრასტრუქტურის სამინისტროს წარმომადგენლები.

„ჩამოსული არიან ინფრასტრუქტურის სამინისტროს კრიზისების მართვის სამმართველოს თანამშრომლები და ადგილზე სწავლობენ სიტუაციას, პარალელურად მუშაობს ზარალის დამთვლელი კომისია. რადგან ფორსმაჟორული სიტუაციაა მივიღეთ გადაწყვეტილება, რომ სასწრაფოდ მოვიწვიოთ საპროექტო ფირმა და პარალელურად დაიწყოს მშენებლობები“, – ამბობს აკაკი მაჭუტაძე.

მისივე თქმით, ადგილობრივი თვითმმართველობების წარმომადგენლებთან ერთად მოინახულა ადიგენისა და ახალციხის მუნიციპალიტეტები.

„აწყურში შიდა გზებია გაფუჭებული, ღარები აქვს გზებს გაკეთებულ დაახლოებით 50–60 სმ–ის, რომელიც უნდა შეივსოს, თუმცა კატასტროფული მდგომარეობა არ არის, ადიგენშიც იგივე მდგომარეობაა რაც ახალციხეში“, – ამბობს გუბერნატორი.

რაც შეეხება სასოფლო სამეურნეო სავარგულებს, სამცხე–ჯავახეთის გუბერნატორი განმარტავს, რომ თუ მოსახლე აგროდაზღვევის პროგრამაშია ჩართული დაახლოებით 80 პროცენტს სახელმწიფო აუნაზღაურებს.

„ვისაც დაზღვეული აქვს მიწის ნაკვეთები, მას ზარალს სახელმწიფო აუნაზღაურებს, სხვა შემთხვევაში არამგონია რომ ეს ზარალი ანაზღაურდეს. მთელი საქართველოს მასშტაბით სასოფლო–სამეურნეო სავარგულები განადგურებულია და სახელმწიფოს ამდენი რესურსი არამგონია ჰქონდეს“, – ამბობს აკაკი მაჭუტაძე და ამატებს, რომ რაც შეეხება ინფრასტრუქტურული კუთხით მიყენებულ ზარალს, ხიდები იქნება, გზები თუ რომელიმე მოსახლის სახლის სახურავი დაზიანებული, ამას სახელმწიფო აანაზღაურებს.

შეგახსნებეთ, რომ სტიქიამ 11 ივნისს სამცხე–ჯავახეთის სამი მუნიციპალიტეტი ადიგენი, ახალციხე და ბორჯომი დააზარალა. თითოეულ მუნიციპალიტეტში უკვე შექმნილია ზარალის დამთვლელი კომისია, რომელიც სტიქიით მიყენებულ ზარალს შეისწავლის.

[თამარ თოთაძე, ბორჯომი]