ადგილობრივი: წნისში სეტყვამ მოსავლის 70 პროცენტი გაანადგურა

ახალციხის მუნიციპალიტეტის სოფელ წნისში სეტყვა დღეს, 11 ივნისს, დაახლოებით 16:30 საათისთვის დაიწყო. ადგილობრივები ამბობენ, რომ სტიქია 20–30 წუთი გაგრძელდა და მსხვილი სეტყვა მოდიოდა.

სოფელ წნისში მცხოვრები თამარ გელაშვილი, რომლის ოჯახის ძირითადი შემოსავალი სოფლის მეურნეობაა, ამბობს, რომ კრედიტებით შეძენილი სათესლე მასალა წყალში ჩაეყარათ.

„ყველაფერი გაფუჭდა, კაკალი სულ ჩამოყარა, კიტრი ახალი ამოსული იყო და სულ წალეკა. ვენახიც განადგურდა, თითქმის 70 პროცენტი გაფუჭებულია“, – ამბობს თამარ გელაშვილი და ამატებს, რომ გარდა ნათესებისა, სეტყვამ სახლის სახურავიც დააზიანა.

სტიქიამ წნისს უკვე მეორედ შეუტია. ადგილობრივები ამბობენ, რომ წელს პირველი სეტყვა 3 ივნისს მოვიდა, თუმცა მაშინ შედარებით ნაკლებად დააზარალდნენ.

ადგილობრივი დათო კახიშვილის თქმით, მოსავლის 70 პროცენტი განადგურებულია.

„თუ ჰექტარ მიწის ნაკვეთზე ერთი ტონა კარტოფილი უნდა მიმეღო, ახლა 300 კილოს მივიღებ. ასევეა ხეხილიც და ვაზიც“, – ამბობს კახიშვილი.

ახალციხის მუნიციპალიტეტის გამგეობაში განმარტავენ, რომ ზარალს სპეციალური კომისია შეისწავლის და ამის შემდეგ დადგინდება ვის რა ოდენობის ზარალი მიადგა.

შეგახსნებთ, რომ დღეს სტიქიამ ახალციხის რვა სოფელი დააზარალა. ძლიერმა წვიმამ აწყურში ნაშალი მიწა ცენტრალურ მაგისტრალზე ჩამოიტანა, სადაც მოძრაობა დაახლოებით ერთი საათის განმავლობაში შეიზღუდული იყო.

წნისის გარდა დაისეტყვა კიდევ შვიდი სოფელი. ყველა სოფელში ამბობენ, რომ მოსავლის დიდი ნაწილი განადგურებულია.


[თამარ თოთაძე, ახალციხე]