დასეტყვილ აწყურში უმოსავლო შემოდგომას პროგნოზირებენ [Video]

მთავარი → ეკონომიკა, რეპორტაჟი 12.06.2015

გუშინ, 11 ივნისს მოსულმა ძლიერმა წვიმამ და სეტყვამ, ახალციხის მუნიციპალიტეტის სოფელ აწყურში ადგილობრივთა ნაწილის სახლები დატბორა და ნათესები წალეკა. აწყურის ერთ უბანში ღვარცოფმა სახლებამდე მისასვლელი გზაც მოგლიჯა. ადგილობრივი ხელისუფლება ზარალს ითვლის, მოსახლეობა კი დახმარებას ელის.

შეგახსენებთ, გუშინ, 11 ივნისს, სტიქიამ ადიგენს, ახალციხესა და ბორჯომს შეუტია. ადიგენში 5 სოფელი დაისეტყვა: დიდი და პატარა სმადა, ენთელი, ლელოვანი და ამხერი. აქ ძირითადად სასოფლო–სამეურნეო სავარგულები განადგურდა და შინაური ფრინველი დაიხოცა. ასევე ნათესები განადგურდა ახალციხის 8 სოფელში: აწყურში, გიორგიწმინდაში, ფერსაში, მუგარეთში, კლდეში, წნისში, გურკელსა და წინუბანში. ბორჯომს კი გუშინ ძლიერი წვიმა უტევდა. აქ ტაძრისი, საკირე და დვირი დაზარალდა. ადიდებულმა მდინარე საკირულამ დააზიანა გზები, სასმელი წყლის სისტემები და ელექტროენერგიის გადამცემი ხაზები.

სტიქიიდან მეორე დღეს სამცხე–ჯავახეთის სახელმწიფო რწმუნებულმა აკაკი მაჭუტაძემ სტიქიით დაზარალებული მუნიციპალიტეტები საქართველოს რეგიონული განვითარებისა და ინფრასტრუქტურის სამინისტროსა და ადგილობრივი ხელისუფლების წარმომადგენლებთან ერთად მოინახულა. გუბერნატორი ამბობს, რომ ვინც აგრო–დაზღვევის პროგრამაშია ჩართული, ზარალის 80 პროცენტი აუნაზღაურდება, ხოლო მათ, ვისაც მოსავალი დაზღვეული არ აქვს, სახელმწიფო ვერ დაეხმარება.

[ნინო ნარიმანიშვილი, ოთარ აწყურელი, ახალციხე]