ახალციხეში 8 სოფელი დაისეტყვა

დღეს, 11 ივნისს ახალციხის მუნიციპალიტეტის რვა სოფელი: აწყური, გიორგიწმინდა, ფერსა, მუგარეთი, კლდე, წნისი, გურკელი და წინუბანი დაისეტყვა. დაზიანებულია სასოფლო–სამეუნეო სავარგულები.

ამ დროისთვის გადაკეტილია აწყურში ცენტრალური მაგისტრალი. ადგილობრივების თქმით, ძლიერმა წვიმამ გზაზე ნაშალი მიწა ჩამოიტანა, რამაც საავტომობილო მოძრაობა შეაფერხა.

"აწყურის ცენტრში, მაღაზიასთან არის გზა გადაკეტილი, ზემოდან ჩამოიტანა მიწა და ქვები", – გვითხრა სატელეფონო საუბარში ერთ–ერთმა ადგილობრივმა.

დასეტყვილ სოფლებში იმყოფებიან ახალციხის მუნიციპალიტეტის გამგებელი და სამსახურების წარმომადგენლები.

როგორც გამგეობაში აცხადებენ, შეიქმნება სპეციალური კომისია, რომელიც სტიქიის შედეგად მიყენებულ ზარალს შეისწავლის.

შეგახსენებთ, დღეს სეტყვა იყო ადიგენშიც. ადიგენში 5 სოფელი დაისეტყვა.

[თამარ თოთაძე, ახალციხე]