მაკა სუდაძე: გადავწყვიტეთ საფინანსო საკითხებს მხარი აღარ დავუჭიროთ

ახალციხის მუნიციპალიტეტის რიგით მეათე საკრებულოს სხდომაზე დეპუტატებმა ხუთი საკითხი განიხილეს. დღის წესრიგით გათვალისწინებული ორი საკითხი 2015 წლის ადგილობრივ ბიუჯეტში შესულ ცვლილებებს ეხებოდა. როგორც ახალციხის მუნიციპალიტეტის საფინანსო – საბიუჯეტო სამსახურის უფროსი გელა ლომიძე ამბობს, 2015 წლის 2 ივნისის განკარგულების საფუძველზე გაიზარდა როგორც ბიუჯეტის შემოსავლები, ასევე ხარჯები.

„ცვლილებების შემდეგ 2015 წლის ბიუჯეტის შემოსულობებში გეგმამ შეადგინა 6 417 200 ლარი, მათ შორის სახელმწიფო ბიუჯეტიდან მიღებული ტრანსფერების არის 2 517 200 ლარი, ხოლო ადგილობრივი ბიუჯეტიდან, როგორც თავიდან დავამტკიცეთ, ისევ 3 900 000 ლარია“, – განმარტავს გელა ლომიძე.

გარდა ამისა ცვლილებები შევიდა 2015 წლის ბიუჯეტით განსაზღვრული სახელმწიფო შესყიდვების გეგმაში.

„მთავრობის განკარგულებით წყრუთი – ანის მიმართულებით საავტომობილი გზის რეაბილიტაციისთვის გამოგვეყო 600 412 ლარი. მიმდინარე კვირაში გამოცხადდება სახელმწიფო შესყიდვა და თვის ბოლოს უკვე დაიწყება გზის რეაბილიტაცია. ძირითადი ცვლილება ამ მიმართულებით ეს არის“, – ამბობს ახალციხის მუნიციპალიტეტის გამგეობის შესყიდვების სამსახურის უფროსი ქეთევან ინასარიძე.

აღნიშნულ ცვლილებებს არ ეთანხმებიან საკრებულოს დეპუტატები „ერთიანი ნაციონალური მოძრაობიდან“. მათი თქმით, საფინანსო–საბიუჯეტო საკითხებს მხარს იქამდე არ დაუჭერენ, ვიდრე თანხები უფრო ნათელი არ გახდება.

როგორც ფრაქცია „ერთიანი ნაციონალაური მოძრაობის“ თავმჯდომარე მაკა სუდაძე ამბობს, კარგი იქნება თუ უფრო მეტი პატივისცემით და პასუხისმგებლობით მოეკიდებიან საკრებულოს წევრებს.

„როგორც ყოველთვის, დღესაც შეცდომები იყო რიცხვებში, მაგალითად შესყიდვების ნაწილში მიღებული ციფრი არ ემთხვეოდა შესყიდვების ჩამონათვალში დაფიქსირებულ ციფრს, ანუ ჯამი იყო სხვადასხვა. როგორც მერე განმარტეს ეს იყო ტექნიკური შეცდომა, თუმცა ეს ასე არ არის, ჩვენ ვღებულობთ კანონიერ დოკუმენტს, რომელიც მტკიცდება და ახლა ამის ჩასწორება შეუძლებელია, ამას სჭირდება საკრებულოს სხდომა“, – ამბობს მაკა სუდაძე და ამატებს, რომ უფრო მეტი პასუხისმგებლობით, რომ მოკიდებოდნენ ამ საკითხს აღნიშნული შეცდომა არ გაიპარებოდა.

კიდევ ერთი საკითხი რასაც „ნაციონალებმა“ მხარი არ დაუჭირეს ახალციხის მუნიციპალიტეტის საკრებულოში არსებული ექსკავატორის, ახალციხის მუნიციპალიტეტის მიერ დაფუძნებულ აიპებზე და შპს – ებზე უსასყიდლო სარგებლობის უფლებით გადაცემის თაობაზე თანხმობის მიცემას ეხებოდა.

როგორც გამგეობის წარმომადგენლებმა სხდომაზე განმარტეს იმის გამო, რომ საკრებულომ ექსკავატორის მოთხოვნაზე თითოეულ დაწერილ განცხადებას კენჭი აღარ უყაროს, განკარგულებას მიიღებენ, რომელიც გამგეობას საშუალებას მისცემს მიმართვის საფუძველზე მოახდინოს ექსკავატორის უსასყიდლოდ გადაცემა აიპებზე ან შპს – ებზე.

როგორც მაკა სუდაძე ამბობს, ეს კიდევ ერთი უპატივცემულობაა საკრებულოს მიმართ: „ჩვენ არ ვუჭერთ მხარს ექსკავატორის იჯარით გადაცემას საკრებულოს გვერდის ავლით“.

[მანანა სარაშვილი, ახალციხე]