ბიუჯეტის კვარტალური შესრულების ანგარიში უმცირესობის პროტესტის ფონზე

ახალციხის მუნიციპალიტეტის რიგით მერვე საკრებულოს სხდომაზე ოთხი საკითხი განიხილეს. ბოლო საკითხი, რომელიც 2015 წლის ბიუჯეტის პირველი კვარტლის შესრულების შესახებ ანგარიშს ეძღვნებოდა „ნაციონალებმა“ პროტესტის ნიშნად დატოვეს.

„პროცედურულად ამ კვარტლის შესრულების ანგარიშს წინ უნდა უძღოდეს გამგებლის ანგარიში და სამსხურების მიერ შესრულებული, გაწეული სამუშაოს ანგარიში. რამდენი ხანია ვითხოვთ, არ გაკეთდა წლის ანგარიში, არ გაკეთდა კვარტლის ანგარიში. შესაბამისად, როგორც დეპუტატმა, ჩემს თავს არ მივეცი უფლება უბრალოდ მომესმინა ციფრების რახარუხი, რომლიც არაფრის მთქმელი არ არის ჩემთვის. გაუგებარია რა მოისმინეს იმ დეპუტატებმა, რა დაამტკიცეს საკრებულოს სხდომაზე“, – ამბობს ფრაქცია „ერთიანი ნაციონალური მოძრაობის“ ხელმძღვანელი მაკა სუდაძე.

სამთვიანი ანგარიშით საკრებულოს დეპუტატების წინაშე საფინანსო –საბიუჯეტო სამსახურის უფროსი გელა ლომიძე წარსდგა. მისი განმარტებით, შემოსულობები 20 პროცენტით არის შესრულებული, ხარჯვითი ნაწილი 15 პროცენტით.

როგორც მუნიციპალტეტის გამგეობაში განგვიმარტეს, ანგარიში მზადების პროცესშია და გამგებელი საკრებულოს წინაშე უახლოეს სხდომაზე წარადგენს.

ახალციხის მუნიციპალიტეტის 2015 წლის ბიუჯეტი 5. 905 200 ლარია.

[თინათინ ზაზაძე, ახალციხე]