ახალციხის მუნიციპალიტეტის გამგეობაში სამ შტატს ამატებენ

უმცირესობამ მხარი არ დაუჭირა ახალციხის მუნიციპალიტეტის გამგეობის იურიდიული სამსახურის დებულების დამტკიცებას. აღნიშნულ სამსახურს ორი შტატი ემატება. ასევე არ დაუჭირეს მხარი „ნაციონალებმა“ ადმინისტრაციულ სამსახურში ერთი შტატის დამატებას.

„ამ ბოლოს, თითქმის ყველა სხდომაზე ემატება მინიმუმ ერთი შტატი, დროა ეს დასრულდეს. თუ საჭიროა კონსულტაციები, შევიკრიბოთ და ბოლოს და ბოლოს გავარკვიოთ, რამდენი თანამშრომელია საჭირო იმისთვის, რომ გამგეობამ და საკრებულომ ეფექტურად იმუშაოს“, – განაცხადა „ერთიანი ნაციონალური მოძრაობის“ წევრმა მაკა სუდაძემ.

უმცირესობის კრიტიკა მოჰყვა ბიუჯეტის შესრულება–არშესრულების საკითხსაც.

სხდომაზე საფინანსო–საბიუჯეტო სამსახურის უფროსმა გელა ლომიძემ აღნიშნა, რომ ახალციხის მუნიციპალიტეტის გამგეობის ბიუჯეტი თითქმის 100 პროცენტით შესრულდა.

„ეს არის მოსახლეობისთვის თვალში ნაცარის შეყრა. სინამდვილეში ბიუჯეტი 82 პროცენტით შესრულდა და ესეც ხარჯვით ნაწილში, საურავებისა და ჯარიმების ხარჯზე“, – ამბობს მაკა სუდაძე.

ახალციხის მუნიციპალიტეტის გამგებელმა ზაზა მელიქიძემ გამგეობაში შტატების დამატება საქმის სიმრავლით ახსნა.

„ერთი შტატი ემატება საორგანიზაციო განყოფილებაში, რომელიც უზრუნველყოფს მუნიციპალიტეტის საკუთრებაში არსებული ქონების რეგისტრაციას და მასზე მონიტორინგს. იურიდიულ სამსახურს დაემატა ორი შტატი: განყოფილების უფროსი და სპეციალისტი. ეს განყოფილება შედგებოდა სამი წევრისაგან. იქიდან გამომდინარე, რომ მუნიციპალიტეტში საკმაოდ ვრცლად არის იურიდიული საკითხები და მოსახლოებას ბევრი კითხვა აქვს, მიზანშეწონილად მივიჩნიეთ გაძლიერებულიყო ეს სამსახური“, – ამბობს ზაზა მელიქიძე.

ახალციხის მუნიციპალიტეტის გამგეობა აღნიშნულ შტატებზე ვაკანსიებს ორ დღეში გამოაცხადებს.

[მანანა სარაშვილი, ახალციხე]