ახალციხის თემში უმცირესობა უმრავლესობას ბიუჯეტს უწუნებს

დღეს, 26 დეკემბერს, თვითმმართველი თემის ახალციხის მუნიციპალიტეტის საკრებულოს ამ წლის ბოლო, მე–13 სხდომა გაიმართა. დეპუტატებმა სხდომაზე 8 საკითხი განიხილეს. თუმცა, ყველა საკითხი ერთხმად არ დაუმტკიცებიათ.

საკითხს – „ახალციხის მუნიციპალიტეტის 2015 წლის ბიუჯეტით განსაზღვრული სახელმწიფო შესყიდვების გეგმის დამტკიცების შესახებ“ 2014 წლის N24 განკარგულებაში ცვლილებების შეტანის თაობაზე“, – „ერთიანი ნაციონალური მოძრაობის“ დეპუტატებმა მხარი არ დაუჭირეს.

„ერთიანი ნაციონალური მოძრაობის“ წევრის მაკა სუდაძის განმარტებით, წარდგენილი დოკუმენტი მისთვის შეურაცხმყოფელი იყო: „გეგმა არ იყო კარგად მომზადებული. ტექნიკური შეცდომები იყო მიმატება–გამოკლებაში გაპარული და ჩემთვის, როგორც დეპუტატისთვის, შეურაცხმყოფელია, როდესაც მთავაზობენ ასეთი სახის დოკუმენტს დასამტკიცებლად. გარდა ამისა აზრობრივი შენიშვნებიც მქონდა, ბევრი მუხლი, რომელიც გამოტანილი იყო შესყიდვების გეგმაში, თვითონ ბიუროსთვის იყო გაურკვეველი“.

გარდა ამისა, მისივე თქმით, ხარჯები იყო გაზრდილი ტრანსპორტისთვის და საკანცელარიო ნივთების შესაძენად: “მეჩვენება, რომ ტრანსპორტის ხარჯებში იყო ძალიან დიდი თანხა ჩადებული. ასევე დიდია თანხა საკანცელარიოში, 30.500 ლარია საკრებულოსა და გამგეობის საკანცელარიო ნივთებისთვის, ვგულისხმობ მხოლოდ ქაღალდებისა და კალმების შესყიდვის ხარჯებს. მიმაჩნია, რომ მაშინ, როდესაც რაიონის ბიუჯეტი ისედაც მცირეა, ასეთი სახის ხარჯებში უნდა გავაკეთოთ ეკონომია“.

ახალციხის საკრებულოში განმარატვენ, რომ ეს იყო ტექნიკური ხარვეზი, რომელსაც გამოასწორებენ და აქ საგანგაშო არაფერია.

„შესყიდვების თაობაზე 2015 წლის პროექტში ცვლილებები იყო შესატანი და ამ ცვლილებებთან ერთად ალბათ ტექნიკური ხარვეზი იყო, რაც ქალბატონმა მაკამ აღნიშნა შეჯამებაში. ეს გამოსწორებადია და საგანგაშო არაფერია“, – ამბობს საკრებულოს თავჯდომარის მოადგილე გელა ნოზაძე.

[თინათინ ზაზაძე, ახალციხე]