ქალაქის საკრებულოს სხდომაზე განხილულ საკითხებს ოპოზიციამ მხარი არ დაუჭირა

ქალაქ ახალციხის მუნიციპალიტეტის საკრებულოს რიგით მესამე სხდომა დღეს, 16 თებერვალს გაიმართა. დეპუტატებმა ხუთი საკითხი განიხილეს. მათი უმრავლესობა ახალციხის მუნიციპალიტეტის 2015 წლის ბიუჯეტში შესულ ცვლილებებს და სოციალური დახმარების გაცემის წესის დამტკიცებას ეხებოდა. აღნიშნული საკითხებიდან „ერთიანი ნაციონალური მოძრაობისა“ და „გაერთიანებული დემოკრატიული მოძრაობის“ წარმომადგენლებმა მხარი არცერთს არ დაუჭირეს.

"დღეს სხდომაზე განსახილველად გამოტანილი თითქმის ყველა საკითხი იმიტომ დადგა დღის წესრიგში, რომ ქალაქის საკრებულო ჯერ კიდევ ვერ ჩამოყალიბდა, თუ რამდენი ადამიანია საჭირო იმისთვის, რომ მერიამ და საკრებულომ ეფექტურად იმუშაოს. წესდებებსაც არ დავუჭირეთ მხარი, რადგან უკვე ცხრაჯერ განიხილეს წესდებებში ცვლილებები დასამტკიცებლად", – აცხადებს დეპუატატი "ნაციონალური მოძრაობიდან" მალხაზ გიქოშვილი.

იგივე მოტივით ხუთი საკითხიდან მხარი არცერთს არ დაუჭირა დეპუტატმა „გაერთიანებული დემოკრატიული მოძრაობიდან“ ჯიმშერ გოგოლაურმა.

„ქალაქ ახალციხის მუნიციპალიტეტის მერიის ხარჯი ყოველ სხდომაზე იზრდება, ბიუჯეტის თითქმის ერთი მესამედი მათ ხელფასებში მიდის, როდესაც ამხელა პრობლემები აქვთ სოციალურად დაუცველებს, ომის ვეტერანებს, მარტოხელა დედებს თითქმის ყველა სხდომაზე შტატების დამატებას და ხელფასების გაზრდას არ უნდა ვიხილავდეთ“, – ამბობს ჯიმშერ გოგოლაური.

[მანანა სარაშვილი, ახალციხე]