დღეს ახალციხის მუნიციპალიტეტის საკრებულოს სხდომაზე დეპუტატებმა ექვსი საკითხი განიხილეს, აქედან ძირითადი საკითხები ახალციხის მუნიციპალიტეტის 2015 წლის ბიუჯეტის პროექტში შესულ ცვლილებებს ეხებოდა.
როგორც ახალციხის მუნიციპალიტეტის გამგებლის მოადგილე გურამ მელიქიძე ამბობს, მომავალი წლის ბიუჯეტის პროექტში ძირითადი ცვლილებები მას შემდეგ შევიდა, რაც 25 ნოემბერს ეს საკითხები სტუდენტებთან და არასამთავრობო ორგანიზაციების წარმომადგენლებთან ერთად განიხილეს.
„რომელიმე არასამთავრობო ორგანიზაციიდან, ან მოქალაქეებიდან რაიმე წერილობითი შენიშვნა არ შემოსულა, თუმცა განხილვის დროს იყო ზეპირი შენიშვნები, ძირითადად, სოციალური დახმარებისა და ჯანდაცვის კუთხით. შეძლებისდაგვარად ეს შენიშვნები გავითავლისწინეთ და ამ კუთხით ბიუჯეტში ცვლილებები შევიტანეთ“, – ამბობს გურამ მელიქიძე.
როგორც ახალციხის მუნიციპალიტეტის გამგეობის საფინანსო-საბიუჯეტო სამსახურის უფროსი გელა ლომიძე ამბობს, შემცირდა არაფინანსური აქტივობის მუხლი, რის საფუძველზეც ბიუჯეტში ჯანდაცვისთვის გათვალისწინებული თანხა 150 ათასი ლარით გაიზარდა. აქედან 60 ათასი ლარით გაიზარდა საოპერაციო ხარჯები და 25 ათასი ლარის ნაცვლად 45 ათასი ლარი გახდა ფულადი დახმარება ახალშობილებზე.
„ამ წელში თუ პირველ ბავშვზე გავცემდით 100 ლარს, მომავალი წლიდან ეს დახმარება 125 ლარით გაიზრდება. 200 ლარს გავცემთ თუ სამ შვილზე მეტი ჰყავთ. 225 ლარს გავცემთ ოთხ შვილზე მეტის ყოლის შემთხვევაში“, – ამბობს გელა ლომიძე და ამატებს, რომ შენიშვნები ხელფასებთან დაკავშირებითაც იყო რაც მეტწილად გამოსწორდა: „30 ათასით შევამცირეთ ხელფასების მუხლი და ეს თანხები სხვადასხვა მიმართულებით გადავანაწილედ“.
გარდა ამისა, საახალწლო მზადებასთან დაკავშირებით, რამდენიმე ცვლილება შესყიდვების გეგმაშიც განხორცილედა. ახალ წელთან დაკავშირებით ახალციხის მუნიციპალიტეტის გამგეობა იძულებით გადაადგილებულ პირებს პროდუქტებს გადასცემს, ასევე, კულტურის სამსახურმა მუნიციპალიტეტში არსებული კულტურის სახლებისთვისა და საბავშვო ბაღებისთვის ნაძვის ხის მოსართავი მოწყობილობები და საახალწლო ნაძვის ხესთან დასარიგებელი სასაჩუქრე პაკეტები უნდა შეიძინოს.
გამგეობა 4 200 ლარის ფარგლებში ტექნიკური მარილის შეძენასაც გეგმავს.
რამდენიმე ცვლილებები შევიდა სახელმწიფო ბიუჯეტშიც, როგორც შესყიდვების სამსახურის უფროსი ქეთევან ინასარიძე ამბობს ერთ – ერთი პროგრამის ფარგლებში სოფელ ზიკილიის რიტუალების სახლისთვის მაცივარის შესაძენად 4 ათასი ლარი იყო გამოყოფილი, რისთვისაც მხოლოდ 3 800 ლარი დაიხარჯა, დარჩენილი თანხით კი გამგეობა ამავე სოფლის რიტუალების სახლისთვის ჭურჭელს შეიძენს.
„გარდა ამისა სახელმწიფო ბიუჯეტში კიდევ ერთი ცვლილება გამოიწვია იმან, რომ სოფელ ფერსაში და წინუბანში სოფლის პროგრამით გათვალისწინებული პროექტიდან დარჩენილი თანხით, მოსახლეობის გადაწყვეტილებით შევიძენთ სასმელი წყლის მილებს“,– ამბობს ქეთევან ინასარიძე.
თვითმმართველი თემის ახალციხის მუნიციპალიტეტის 2015 წლის ადგილობრივი ბიუჯეტი 3.900.000 ლარით განისაზღვრა.
[მანანა სარაშვილი, ახალციხე]