ევროკავშირისა და საქართველოს ურთიერთობების შესახებ ახალციხეში ფილმის ჩვენება გაიმართა

ევროკავშირის პროექტის "ერთად შევეგებოთ ევროპას" ფარგლებში მობილური საინფორმაციო ცენტრის წარმომადგენლები ახალციხის საჯარო სკოლებში საინფორმაციო შეხვედრებს მართავენ. დღეს, 2 ივნისს შეხვედრა ახალციხის მესამე საჯარო სკოლაში გაიმართა. სომხურენოვანი სკოლის მოსწავლეებს ევროკავშირის და საქართველოს ურთიერთობების შესახებ თომა ჩაგელიშვილის მიერ მომზადებული ფილმი აჩვენეს.

"ფილმში მოთხრობილია ევროკავშირის დაარსების ისტორიიდან დღემდე ევროკავშირი –საქართველოს ურთიერთობების შესახებ. უკვე ვიყავით პირველ საჯარო სკოლაში, დღესვე შევხვდებით მეხუთე საჯარო სკოლის მოსწავლეებსაც", – ამბობს პროექტის "ერთად შევეგებოთ ევროპას" წარმომადგენელი თამუნა ხურცია.

პროექტის ფარგლებში მობილური საინფორმაციო ცენტრის წარმომადგენლები მთელი წლის განმავლობაში 140 სკოლას ესტუმრებიან. საინფრომაციო შეხვედრა უკვე გამართეს ნინოწმინდის რამდენიმე სოფელში:"სოფელ ფოკაში კარავი გვქონდა დადგმული სადაც, ბავშვებს ევროკავშირის ქვეყნების კონტურული დროშები გავაფერადებინეთ. ინტერაქტიული ღონისძიებებით ვცდილობთ გავაგებინოთ საქართველო–ევროკავშირის ურთერთობების შესახებ, რა პერსპექტივა გვაქვს, რა სარგებელი შეიძლება მივიღოთ, ახლა რა ეტაპზეა ეს ურთიერთობები", – ამბობს თამუნა ხურცია.

მისივე თქმით, სკოლებს შერჩევითი პრინციპით არჩევენ. ძირითადი აქცენტი კი რეგიონებში ყველაზე მიუვალ სოფლებზე, ეთნიკურ უმცირესობებსა და რეგიონულ ცენტრებზეა გაკეთებული.

[თინათინ ზაზაძე, ახალციხე]