‘პროპაგანდას სიმართლით დავუპირისპირდებით’– ახალი პროექტი ევროინტეგრაციის შესახებ

პროექტის პრეზენტაცია „ნატოსა და ევროკავშირის შესახებ საინფორმაციო ცენტრის“ წარმომადგენლებმა სამცხე–ჯავახეთის სამხარეო ადმინისტრაციაში, დღეს, 12 მარტს გამართეს. შეხვედრას ადგილობრივი თვითმმართველობისა და არასამთავრობო სექტორის წარმომადგენლები ესწრებოდნენ.

„ეს არის პირველი მასშტაბური პროექტი, რომელიც მიზნად რეგიონებში დასავლური ინტეგრაციის პროცესების შესახებ მოსახლეობის ინფორმირებულებას ისახავს მიზანად. ჩვენ გვსურს, რომ ამ პროცესში მოსახლეობისგან გაცნობიერებული მხარდაჭერა მივიღოთ. პროპაგანდასა და ცრუ ინფორმაციას არა პროპაგანდით, არამედ მართალი ინფორმაციით დავუპირისპირდებით“, – ამბობს „ნატოსა და ევროკავშირის შესახებ საინფორმაციო ცენტრის“ წარმომადგენელი სამცხე–ჯავახეთში თეონა ზურაბაშვილი.

საინფორმაციო ცენტრს ქვეყნის მასშტაბით 12 რეგიონული ბიურო ექნება და სხვადასხვა სოფელში ჯამში 504 სამუშაო შეხვედრას ჩაატარებს. სამცხე–ჯავახეთში 18 თვის განმავლობაში მსგავსი ტიპის 72 შეხვედრა გაიმართება. პროექტის ფარგლებში, ათივე რეგიონში, ასევე, შერჩეულია 20 მედია გამოცემა, მათ შორის ახალქალაქსა და ნინოწმინდაში მოქმედი საინფორმაციო სააგენტოები.

„ეს არის რუსულ პროპაგანდასთან ბრძოლის პროცესი, მოწინააღმდეგე მხარეს მდგომი რუსეთის ფედერაცია რაოდენობრივად და ფინანსურად ჩვენზე გაცილებით ძლიერია. ჩვენი მიზანი კი ის არის, რომ საინფორმაციო ბრძოლაში ხელისუფლება არ აღმოჩნდეს მარტო“, – ამბობს საქართველოს სტრატეგიული კომუნიკაციების ცენტრის ხელმძღვანელი გიორგი მოლოდინი.

პროექტი „დასავლური ინტეგრაციის პროცესის შესახებ ინფორმირებულობისა და ჩართულობის გაზრდა რეგიონებში“ აშშ-ს სახელმწიფო დეპარტამენტი და საქართველოში აშშ-ს საელჩოს მიერ ნატოსა და ევროკავშირის შესახებ საინფორმაციო ცენტრი ახორციელებს. პროექტის ბიუჯეტი ნახევარი მილიონი აშშ დოლარია.



[ავთო ინასარიძე, ახალციხე]