ახალციხეში "ევროპის კვირეულის" ფარგლებში ღონისძიებები გაიმართა

"ევროპის კვირეულის" ფარგლებში დღეს დაგეგმილი ღონისძიებები ინტელექტუალური თამაშით დაიწყო. "რა, სად, როდის" კონკურსში მონაწილეობა ახალციხის საჯარო სკოლების და კერძო სკოლა "მზექას" მოსწავლეებმა მიიღეს. თითოეული სკოლიდან 6 – 6 მოსწავლე შეირჩა.

"მანამდე ამ მოსწავლეებს "ევროპის კვირეულის" ფარგლებში ტრენინგები ჩაუტარდათ, სადაც მათ ევროკავშირის თემაზე ამომწურავი ინფორმაცია მიიღეს", – ამბობს მერიის კულტურისა და განათლების განყოფილების უფროსი მარინა მერაბიშვილი.

"რა, სად, როდის" გამარჯვებულები მეხუთე საჯარო სკოლის მოსწავლეები გახდნენ. ჟიურიმ, რომლის შემადგენლობაშიც იყვნენ ნატოსა და ევროკავშირის საინფორმაციო ცენტრის წარმომადგენლები და ახალციხის მერის მოადგილე ზაზა თამარაშვილი, ესეებისა და პოსტერების კონკურსში გამარჯვებულებიც გამოავლინა.

ესეების კონკურსში პირველი ადგილი ისევ მეხუთე საჯარო სკოლის მოსწავლემ აიღო, მეორე ადგილი კი მესამე საჯარო სკოლის მოსწავლემ მოიპოვა. პოსტერების კონკურსის გამარჯვებული კერძო სკოლა "მზექა" გახდა.

გამარჯვებულები მერიამ წიგნებით და სიგელებით დააჯილდოვა, ხოლო ნატოსა და ევროკავშირის ცენტრის წარმომადგენლებმა მათ ფასიანი საჩუქრები გადასცეს. ასევე ივნისში "რა, სად, როდის" და "ფორტი ბოიარდის" კონკურსში გამარჯვებული მოსწავლეები ნატოსა და ევროკავშირის ცენტრის ორგანიზებით ექსკურსიაზე თბილისში წავლენ.

"ბავშვები ყველა კონკურსისთვის ძალიან კარგად იყვნენ მომზადებულები", – ამბობს ნატოსა და ევროკავშირის საინფორმაციო ცენტრის წარმომადგენელი თამარ მედუაშვილი.

დღის ბოლოს სამცხე – ჯავახეთის სახელმწიფო უნივერსიტეტის ეზოში ახალციხის საჯარო სკოლის მოსწავლეებმა ასევე ევროკავშირის თემაზე ფლეშმობი გამართეს.

შეგახსენებთ, რომ ახალციხეში "ევროპის კვირეული" ოფიციალურად 8 მაისს გაიხსნა. აღნიშნული პროექტის ფარგლებში დაგეგმილი ღონისძიებები ქალაქ ახალციხის მუნიციპალიტეტის მერიის კულტურის სამსახურის ორგანიზებით იმართება. პროექტის ავტორი კი სამოქალაქო განათლების პედაგოგთა რეგიონული კოორდინატორი ნინო ნადირაძეა.

ნინო ნადირაძის თქმით "ევროპის კვირეული" ახალციხეში 2 ივნისს მთავრდება.

"პროექტის ფარგლებში კვირას, 31 მაისს ევროკავშირის თემაზე "ფორტი ბოიარდი" მოეწყობა, 2 ივნისს კი თომა ჩაგელიშვილის ფილმის, "მოგზაურობა ევროპაში" ჩვენება გაიმართება.

[მანანა სარაშვილი, ახალციხე]