ახალციხის ციხეზე 'ფორტი ბოიარდი' მოეწყო

პროექტის "გავაცნოთ ევროპა სკოლებს" ფარგლებში ღონისძიება 31 მაისს გაიმართა. პროექტის იდეის ავტორის თქმით, მისი განხორციელება ევროპის კვირეულს დაამთხვიეს.

"ფორტ ბოიარდის" მონაწილეები ახალციხის ციხის ტერიტორიაზე, სხვადასხვა ადგილზე განთავსებულ დანომრილ ფურცლებზე დაწერილ შეკითხვებს პასუხობდნენ. შეჯიბრში მონაწილეობა ახალციხის 5 საჯარო და 1 კერძო სკოლის მოსწავლემ მიიღო, საბოლოოდ კი გამარჯვება პირველი სკოლის მოსწავლეების გუნდმა მოიპოვა. გამარჯვებული მოსწავლეები ნატოსა და ევროკავშირის ცენტრის ორგანიზებით ექსკურსიაზე თბილისში წავლენ.

"კითხვები ძირითადად ევროკავშირის თემაზე იყო, ეს ღონისძიება მიზნად ისახავდა ევროკავშირის ღირებულებების, ფასეულობების და სხვა ინსტიტუტების პოპულარიზაციას. ახალგაზრდებმა უნდა გაიგონ თუ რა არის ევროკავშირი, რა ღირებულებები აქვს, დაამსხვრიონ ის სტერეოტიპები, რაც საზოგადოებაში არსებობს და როცა უკვე შევალთ ევროკავშირში, სამოქალაქო საზოგადოება ჩამოყალიბებული იქნება", – ამბობს პროექტის "გავაცნოთ ერთმანეთს ევროპა" იდეის ავტორი ნინო ნადირაძე.

ევროპის კვირეული ახალციხეში ქალაქის მერიის კულტურის სამსახურის მხარდაჭერით მიმდინარეობს. მერიის წარმომადგენლებმა გამარჯვებულები სერთიფიკატებითა და წიგნებით დააჯილდოვეს.

შეგახსენებთ, რომ ახალციხეში ევროპის კვირეული ოფიციალურად 8 მაისს გაიხსნა.

ნინო ნადირაძის თქმით, ევროპის კვირეული 2 ივნისს თომა ჩაგელიშვილის ფილმის ჩვენებით დასრულდება, რომელსაც "მოგზაურობა ევროპაში" ეწოდება.

[თამარ თოთაძე, ახალციხე]