ახალციხეში ევროკავშირის შესახებ იმსჯელეს

შეხვედრა დღეს, 14 აპრილს, ადმინისტრაციის შენობის საკონფერენციო დარბაზში შედგა. ადგილობრივი თვითმმართველობის, მედიისა და არასამთავრობო სექტორის წარმომადგენლებისთვის, ვიზა ლიბერალიზაციაზე საგარეო საქმეთა სამინისტროს ევროინტეგრაციის დეპარტამენტის მესამე მდივანმა ეკატერინე ხოსიტაშვილმა ისაუბრა.

შემდეგი სესია ‘ღრმა და ყოვლისცმომცველი თავისუფალი სავაჭრო სივრცის შესახებ შეთანხმებას (DCFTA)’ დაეთმო, რომლის შესახებაც ვებ პორტალის “ევროპა საქართველოსთვის” წარმომადგენელმა მაიკო გაბულდანმა ისაუბრა.

ნატოსა და ევროკავშირის შესახებ საინფორმაციო ცენტრის წარმომადგენელმა სამცხე-ჯავახეთის რეგიონში თეონა ზურაბაშვილმა კი გააკეთა პრეზენტაცია მითებსა და რეალობაზე ასოცირების ხელშეკრულების ირგვლივ.

„ამ შეხვედრის მიზანს ევროკავშირზე ცნობიერების ამაღლება წარმოადგენს. მონაწილეებს ინფორმაცია მოვაწოდეთ ვიზა ლიბერალიზაციაზე, ასოცირების ხელშეკრულებასა და ევროკავშირის შესახებ“,– ამბობს პროექტის კოორდინატორი თამარ კლდეისელი.

მისი თქმით, მსგავსი სახის შეხვედრის გამართვა რეგიონის სხვადასხვა სკოლებში, ასევე ნინოწმინდასა და ახალქალაქშია დაგეგმილი.

სასწავლო შეხვედრას ორგანიზება ლევან მიქელაძის სახელობის ფონდმა გაუწია. შეხვედრა შედგა პროექტის „სამოქალაქო საზოგადოების შესაძლებლობების განვითარება ეთნიკური უმცირესობებით დასახლებულ რეგიონებში“ ფარგლებში, რომელიც ფონდ „ღია საზოგადოება საქართველოს“-თან თანამშრომლობითა და ფინანსური ხელშეწყობით ხორციელდება.

პროექტის მიზანია ცნობიერების ამაღლება ევროკავშირსა და საქართველოს თანამშრომლობასა და ურთიერთობების გაღრმავებაზე მედიის, არასამთავრობო ორგანიზაციებისა და ადგილობრივი თვითმმართველობის წარმომადგენელთათვის.



[ვარლამ წიკლაური, ახალციხე]