სააპელაციო სასამართლომ დაადასტურა ზურა ხუციშვილის უკანონოდ დაკავება

საპატრულო პოლიციის თანამშრომლებმა, ზურაბ ხუციშვილი ახალციხეში, 12 თებერვალს, ღამით, ადმინისტრაციულ სამართალდარღვევათა კოდექსის 173-ე მუხლით დააკავეს. ახალციხის რაიონული სასამართლოს მოსამართლე ნათია მერაბიშვილმა კი ხუციშვილის ქმედებაში სამართალდარღვევის არარსებობის გამო ადმინისტრაციულ სამართალდარღვევათა საქმის წარმოება შეწყვიტა.

საპატრულო პოლიცია სააპელაციო სასამართლოში ამ გადაწყვეტილების გაუქმებას და ასევე, საქმის ხელახლა განხილვის მიზნით, კვლავ ახალციხის სასამართლოსთვის დაბრუნებას ითხოვდა. სააპელაციო სასამართლომ საპატრულო პოლიციის საჩივარი ზეპირი მოსმენის გარეშე განიხილა და არ დააკმაყოფილა.

შეგახსენებთ, რომ იმ ვიდეომასალაში, რომელიც „სამხრეთის კარიბჭემ“ გაავრცელა, ზურა ხუციშვილის დაკავების ბრძანება სამცხე–ჯავახეთის საპატრულო პოლიციის მთავარი სამმართველოს უფროსის მოადგილემ და ამჟამად უფროსის მოვალეობის შემსრულებელმა დავით მაღრაძემ გასცა: „დაადეთ ბორკილები, ამის ნერვები აღარ მაქვს!“

[თამუნა უჩიძე, ახალციხე]