სამხარეო სამმართველოს უფროსის ყოფილ მოადგილეს ჯარიმის, 250 ლარის გადახდა დააკისრეს

სააპელაციო სასამართლოს გადაწყვეტილებით საქმე განსახილველად კვლავ ახალციხის რაიონულ სასამართლოში დაბრუნდა. სააპელაციოში ადმინისტრაციული სარჩელი სამცხე–ჯავახეთის საპატრულო პოლიციამ გაასაჩივრა. საჩივარი სამცხე–ჯავახეთის სამხარეო მთავარი სამმართველოს უფროსის ყოფილი მოადგილის ვახტანგ გეწაძის მიმართ სამართალდარღვევის არარსებობის გამო ადმინისტაციული საქმის წარმოების შეწყვეტას ეხებოდა.

„ახალციხის რაიონულ სასამართლოში მოსამართლემ საქმის ხელახალი განხილვის დროს პატრულისა და ვახტან გეწაძის შელაპარაკება სამართალდარღვევად მიიჩნია და 179–ე მუხლით 250–ლარიანი ჯარიმა შეუფარდა“, - განაცხადა ვახტანგ გეწაძის ადვოკატმა ნოდარ აკოფაშვილმა.

ადვოკატს მიაჩნია რომ მოსამართლის გადაწყვეტილება არაობიექტურია და ამბობს, რომ პირველი განხილვის დროს მიღებული გადაწყვეტკება მართებული იყო.

გაასაჩივრებენ თუ არა ახალციხის რაიონული სასამართლოს ახალ გადაწყვეტილებას ჯერ-ერობით უცნობია.

„ჩამოვყალიბდებით და ერთად გადავწყვეტთ გავასაჩივროთ თუ არა“, – ამბობს ნოდარ აკოფაშვილი.

შეგახსენებთ, 23 ივნისს, ახალციხეში, რუსთაველის ქუჩაზე, 00:30 საათზე, საპატრულო პოლიციამ შემოწმების მიზნით ავტომანქანა გააჩერა. აღმოჩნდა, რომ მძღოლს თან არ ჰქონდა ტექნიკური პასპორტი, ამიტომ საპატრულო პოლიციამ მას 15–ლარიანი ჯარიმა დაუწერა. სწორედ ამ ფაქტს მოჰყვა შელაპარაკება გეწაძესა და საპატრულო პოლიციის თანამშრომლებს შორის. გეწაძეს თან ყოფილი თანამშრომელი გია მერაბიშვილი ახლდა. გეწაძე სასამართლო დარბაზიდან გაათავისუფლეს, მერაბიშვილს კი 300–ლარიანი ჯარიმა დააკისრეს.


[ვარლამ წიკლაური, ახალციხე]