უკანონოდ დაკავებული ადვოკატი საპატრულოს მორალური ზიანისთვის 100. 000 დოლარს სთხოვს

ნუგზარ სამარჯიშვილის უკანონოდ დაკავების საქმეზე თბილისის სააპელაციო სასამართლომ ახალციხის რაიონული სასამართლოს გადაწყვეტილება ძალაში დატოვა.

ახალციხის რაიონული სასამართლოს გადაწყვეტილებით კი, 2014 წლის 3 აგვისტოს, სამარჯიშვილის ქმედებაში საქართველოს ადმინისტრაციული სამართალდარღვევათა კოდექსის 173-ე მუხლით გათვალისწინებული დარღვევის არ არსებობის გამო, იგი სასამართლო დარბაზიდან დაუყოვნებლივ გათავისუფლდა.

სააპელაციო სასამართლომ პირველი ინსტანციის სასამართლოს გადაწყვეტილება ძალაში, ზეპირი მოსმენის გარეშე, 26 სექტემბერს, დატოვა.
„დარწმუნებული ვარ, უზენაესი სასამართლო ასეთი კატეგორიის საქმეს დაუშვებლად ცნობს, ამიტომ, უკვე შემიძლია ვიმოქმედო, - აცხადებს სამარჯიშვილი და ამატებს, რომ სარჩელს უკვე ამზადებს, - საქართველოს საპატრულო პოლიციას მორალური ზიანის ასანაზღაურებლად 100.000 დოლარს მოვთხოვ“.

სამარჯიშვილი სარჩელს თბილისის საქალაქო სასამართლოში მას შემდეგ შეიტანს, რაც სააპელაციო სასამართლოს გადაწყვეტილება ჩაბარდება.
შეგახსენებთ, რომ ადვოკატი ნუგზარ სამარჯიშვილი 2 აგვისტოს, დაახლოებით ღამის 2:00 საათზე, სამცხე-ჯავახეთის საპატრულო პოლიციის მთავარი სამმართველოს უფროსის მოადგილის მერაბ წურწუმიას მითითებით, სამართალდამცავი ორგანოს მუშაკების მიმართ ბოროტად დაუმორჩილებლობის საბაბით დააკავეს.

გაასაჩივრებს თუ არა შსს სააპელაციო სასამართლოს გადაწყვეტილებას, ამ ეტაპზე უცნობია.

[თამუნა უჩიძე, ახალციხე]