საპატრულო პოლიცია ყოფილი პოლიტპატიმრის საქმეს სააპელაციოში ასაჩივრებს

სამცხე–ჯავახეთის საპატრულო პოლიციის მთავარმა სამმართველომ სააპელაციო სასამართლოში საჩივარი შეიტანა. საპატრულო პოლიცია ახალციხის რაიონული სასამართლოს გადაწყვეტილების გაქუმებას, ასევე, საქმის კვლავ ახალციხის სასამართლოსთვის დაბრუნებას ითხოვს, ხელახლა განხილვის მიზნით.

სააპელაციოში საჩივრის შეტანას ადასტურებს შსს.

ხუციშვილის ადვოკატის ნუგზარ სამარჯიშვილის განცხადებით, ამ ტიპის საქმეები მხოლოდ ერთხელ საჩივრდება და როგორც წესი სააპელაციო სასამართლო ზეპირი მოსმენის გარეშე იხილავს.

„ეს საქმე უზენაესში ვეღარ გასაჩივრდება. ასეთ შემთხვევებში, ხშირად, სააპელაციო სასამართლო წარმოდგენილ მტკიცებულებებს აფასებს, ანუ თუ ახალი მტკიცებულებები არ არის, აღარ იხილავს მას და მხარეთა დაბარების გარეშე ღებულობს გადაწყვეტილებას“, – ამბობს სამარჯიშვილი.

შეგახსენებთ, ყოფილი პოლიტპატიმარი ზურა ხუციშვილი, საპატრულო პოლიციის თანამშრომლებმა, ახალციხეში, 12 თებერვალს ღამით, ადმინისტრაციულ სამართალდარღვევათა კოდექსის 173-ე მუხლით დააკავეს. ახალციხის რაიონული სასამართლოს მოსამართლე ნათია მერაბიშვილმა კი ხუციშვილის ქმედებაში სამართალდარღვევის არ არსებობის გამო ადმინისტრაციულ სამართალდარღვევათა საქმის წარმოება შეწყვიტა.

[თამუნა უჩიძე, ახალციხე]