ადვოკატის უკანონოდ დაკავების საქმეს სააპელაციო სასამართლო ზეპირი მოსმენის გარეშე განიხილავს

ამის შესახებ „სამხრეთის კარიბჭეს“ თბილისის სააპელაციო სასამართლოს მოსამართლის ქეთევან დუგლაძის თანაშემწემ ვიქტორ ჩანგსელიანმა განუცხადა.

მისი თქმით, მოსამართლე 24 სექტემბრამდე შვებულებაშია, ამიტომ სასამართლო პროცესი მას შემდეგ ჩაინიშნება, რაც იგი სამსახურში დაბრუნდება.

ადვოკატ ნუგზარ სამარჯიშვილს კი სურს, რომ მისი საქმე სააპელაციო სასამართლომ ზეპირი მოსმენით განიხილოს: „მინდა თავადაც მოისმინონ ის, რაც იქ ხდებოდა. ამის შესახებ თანაშემწეს უკვე ვთხოვე და გაუკვირდა კიდეც, რადგან უმრავლეს შემთხვევაში, როცა ზეპირი მოსმენის გარეშე იხილავენ საქმეს, წინა ინსტანციის სასამართლოს გადაწყვეტილება ძალაში რჩება“.

შეგახსენებთ, რომ ადვოკატი ნუგზარ სამარჯიშვილი 2 აგვისტოს დააკავეს.ახალციხის რაიონული სასამართლოს გადაწყვეტილებით კი მის ქმედებაში საქართველოს ადმინისტრაციული სამართალდარღვევათა კოდექსის 173-ე მუხლით გათვალისწინებული დარღვევა არ აღმოჩნდა. ახალციხის რაიონული სასამართლოს გადაწყვეტილება შსს-მ სააპელაციო სასამართლოში გაასაჩივრა.

[თამუნა უჩიძე, ახალციხე]