ყოფილი პოლიტპატიმარი ახალციხეში უკანონოდ დააკავეს [video]

შემთხვევა ახალციხეში, რუსთაველის ქუჩაზე 12 თებერვალს ღამით, 01:20 საათზე მოხდა. შსს საპატრულო პოლიციის დეპარტამენტის სამცხე–ჯავახეთის მთავარი სამმართველოს თანამშრომლებმა შემოწმების მიზნით ავტომანქანა გააჩერს. მძღოლი ალკოტესტით შეამოწმეს, იგი ფხიზელი აღმოჩნდა.

მას შემდეგ რაც მძღოლი სამართალდამცავებს დაემშვიდობა, მისი მგზავრი ზურა ხუციშვილი ავტომანქანიდან გადმოვიდა და, ავტომანქანით იქვე მდგომ, სამცხე–ჯავახეთის საპატრულო პოლიციის მთავარი სამმართველოს უფროსის მოადგილესთან, დავით მაღრაძესთან მივიდა. ხუციშვილმა მაღრაძეს მანქანიდან გადმოსვლა სთხოვა და უთხრა: „თუ მაჩერებ, მაშინ უნდა შემამოწმო და თუ არაფერი არ ამომივარდება, მაშინ პასუხი უნდა აგოთ“.



როგორც მოსამართლე ნათია მერაბიშვილის დადგენილებაში (საქმე #15721975–4/042–15წ) ვკითხულობთ, მიუხედავად იმისა, რომ ხუციშვილის მხრიდან პოლიციის თანამშრომლების კანონიერი მოთხოვნისადმი დაუმორჩილებლობას ადგილი არ ჰქონია, იგი ადმინისტრაციულ სამართალდარღვევათა კოდექსის 173–ე მუხლის თანახმად, მაინც დააკავეს. ხუციშვილის მიმართ, საპატრულო პოლიციის წარმომადგენლებმა, სასამართლოში ადმინისტრაციულ სახდელად 15 დღის ვადით პატიმრობა ითხოვეს.

„ზურაბ ხუციშვილის მხრიდან ადგილი არ ჰქონია უცენზურო სიტყვების გამოყენებას, მისი ქმედება გამოიხატა იმაში, რომ საპატრულო პოლიციის თანამშრომლებს და მათ უფროსს დავით მაღრაძეს სთხოვდა აეხსნათ მისთვის გაჩერების მიზეზი“, – ვკითხულობთ დადგენილებაში.
ასევე, მოსამართლე განმარტავს, რომ სასამართლო ვერ გაიზიარებს საპატრულო პოლიციის თანამშრომლების განმარტებას, იმის შესახებ, რომ სამართალდამრღვევი ზურაბ ხუციშვილი არ ემორჩილებოდა პოლიციის თანამშრომლების კანონიერ მოთხოვნას. უფრო მეტიც, მერაბიშვილის განცხადებით, საპატრულო პოლიციის თანამშრომლებმა დაარღვიეს ხუციშვილის კონსტიტუციური უფლება: მას დაკავებისას არ განუმარტეს საქართველოს ადმინისტრაციულ სამართალდარღვევათა კოდექსის 254–ე მუხლით გათვალისწინებული საფუძვლები.

მოსამართლემ, ადმინისტრაციულ სამართალდარღვევათა საქმის წარმოება, ზურა ხუციშვილის მიმართ, საქართველოს ადმინისტრაციულ სამართალდარღვევათა კოდექსის 173–ე მუხლით გათვალისწინებული სამართალდარღვევის ფაქტზე, მის ქმედებაში სამართალდარღვევის არ არსებობის გამო, შეწყვიტა.

ხუციშვილის ადვოკატი ნუგზარ სამარჯიშვილი აცხადებს, რომ მისი დაცვის ქვეშ მყოფი რეალურად დავით მაღრაძემ დააკავა და არა პოლიციის იმ თანამშრომელმა, რომელმაც დაკავების ოქმი შეადგინა: "ამიტომ დაუყოვნებლივ უნდა გაათავისუფლონ მაღრაძე და თუ ასე არ იქნება, მაშინ ის, ვინც მის სამსახურიდან გათავისუფლებას დააყოვნებს".

[თამუნა უჩიძე, ახალციხე]