ლევან ლობჯანიძე ადიგენის საკრებულოს წინააღმდეგ მეორე საჩივარს ამზადებს

ადიგენის მუნიციპალიტეტის საკრებულოს ყოფილი თავმჯდომარე აცხადებს, რომ ფრაქცია „ქართული ოცნება-დემოკრატიული საქართველო“ უკანონოდ შეიქმნა. მისი თქმით, ადგილობრივი თვითმმართველობის კოდექსის 30–ე მუხლის მიხედვით, ფრაქციის შექმნა მხოლოდ პარტიის წევრებს შეუძლიათ, პარტიის მიერ წარდგენილ დეპუტატებს კი შეუძლიათ უკვე შექმნილ ფრაქციაში გაწევრიანდნენ. აღნიშნულ ფრაქციაში კი 4 წევრიდან პარტიის წევრი მხოლოდ ერთია, დანარჩენები წარდგენილი კანდიდატები არიან.

ლობჯანიძე ამბობს, რომ ფრაქციის უკანონობის შესახებ მოგვიანებით შეიტყო: „ამ ბოლო დროს საკრებულოს დაგვევალა გადაგვეწოდებინა სიები, ვინ იყვნენ კომისიებში და ფრაქციებში და რომელი პარტებიდან. შემოვიდა იურიდიული სამსახურის კომისია, რა ვქნა, როგორ შევავსო ცხრილიო, მაშინ აღმოვაჩინე, რომ იყო დარღვევები, განსაკუთრებით, ფრაქცია „ქართული ოცნება – დემოკრატიული საქართველოში“. მითითება მოგვცა პარტიის მონიტორინგმაც, გვთხოვეს გამოგვესწორებინა“.

ლობჯანიძე აღნიშნული ფრაქციის გაუქმებას ითხოვს.

საკრებულოს თავმჯდომარე ირწმუნება, რომ ფრაქცია „ქართული ოცნება დემოკრატიული საქართველო“ სრული კანონის დაცვითაა შექმნილი. თავმჯდომარის მტიკიცებით, ისინი ვალდებული არ არიან გაარკვიონ რომელი დეპუტატია პარტიიდან და რომელი კანდიდატია.

[თინათინ ზაზაძე, ადიგენი]