ადიგენში საკრებულოს ახალი თავმჯდომარე აირჩიეს

საკრებულოს სხდომას 27 დეპუტატი ესწრებოდა. ფარულ კენჭისყრაში მონაწილეობა 17–მა დეპუტატმა მიიღო, საკრებულოს უმცირესობამ „ერთიანი ნაციონალური მოძრაობისა“ და „ნინო ბურჯანაძე–დემოკრატიული მოძრაობის“ წევრებმა, კენჭისყრაში მონაწილეობა არ მიიღეს. 17 დეპუტატიდან, ბოლო წუთებში, ჯანმრთელობის მდგომარეობის გამო, ერთმა დეპუტატმა ვერ შეძლო ხმის მიცემის პროცედურაში მონაწილეობის მიღება. დარჩენილმა 16–მა დეპუტატმა კი მღებრიშვილი საკრებულოს თავმჯდომარედ ერთხმად აირჩია.

ბიოგრაფია

იმედა მღებრიშვილი 1978 წლის 14 აპრილს დაიბადა.
1995 წელს დაამთავრა ბენარის საჯარო სკოლა, 1999 წელს კი ივანე ჯავახიშვილის სახელობის თსუ მესხეთის ფილიალის ისტორიის ფაკულტეტი.
2000 წლიდან ბენარის საჯარო სკოლაში სამხედრო მომზადების მასწავლებლად მუშაობდა. პარალელურად, 2006 წლამდე დირექტორის მოადგილე იყო.
2007 წელს სამცხე–ჯავახეთის სააღსრულებლო ბიუროს აღმასრულებლად დაინიშნა. ამ პოზიციაზე 2014 წლამდე მუშაობდა.
2014 წელს,“ქართული ოცნების“ პროპორციული სიით, ადიგენის საკრებულოს დეპუტატი გახდა. დაინიშნა საფინანსო–საბიუჯეტო, ეკონომიკისა და ქონების მართვის კომისიის თავმჯდომარედ.
ჰყავს მეუღლე და 2 შვილი

შეგახსენებთ, დღეს, 4 მარტს, ადიგენის მუნიციპალიტეტის საკრებულოს სხდომაზე, 17 ხმით 10–ის წინააღმდეგ, დეპუტატებმა ფარული კენჭისყრით საკრებულოს თავმჯდომარე ლევან ლობჯანიძე თანამდებობიდან გადააყენეს. ლობჯანიძე ფიქრობს, რომ მისი გადაყენება რეგიონის გუბერნატორმა მოითხოვა.

[მანანა სარაშვილი, ადიგენი]